روکپتی بلوچستان ءِ بنجاھی شھر زاھدان ءَ ایرانی لشکر ءَ یک ورنایے آوار جنگ ءَ پد بیگواہ کرتگ –
شنگ بیتگیں تامر بندے ءَ گندگ بیت اِنت کہ اود ءَ پوج یک ورنایے ءَ زورانسری آوار جنگ ءُ بیگواہ کنگ ءَ اِنت-
اے تامر زاھدان ءِ یک دمکے ءَ کنگ بیتگ کہ اود ءَ پوج ءُ چیریں ادارھاں یل ورنایے ءِ سر ءَ بیڑ برتگ ءُ آوار جتگ-
آوار جنگ بیتگیں ورنا ءِ پجار مرتضیٰ آذرنوش عالیزئی ءِ نام ءَ زانگ بیتگ کہ آ زاھدان ءِ جھمنند گوشگ بوگ ءَ اِنت-
زانگ بہ بیت گوستگیں روچ ءَ بنجاھی شھر زاھدان ءُ ھاش ءَ سیاسی بندیگانی بندیگی ءِ ھلاپ ءَ لس مھلوک ءَ زھرشانی کتگ –
زھرشانی کنوکاں بیگواھیں مردمانی یل کنگ ءُ زاھدان ءَ کُشگ بیتگیں مردمانی ھاتر ءَ انساپ ءِ اوگام جتگ-
زانگ بہ بیت گوستگیں روچاں پولیس ءِ دست ءَ بندیگیں ابراھیم ریگی نامیں ورنایے ھم لَٹ ءُ کُٹانی چیر ءَ بیران بیتگ ات-
ابراھیم ریگی ءِ بیرانی ءِ پژدر ءَ ایرانی ایمسنٹی انٹرنیشنل ءَ ھم ابراھیم ءِ بندیگجاہ ءَ زوراکی ءُ کوش ایر جتگ ءُ انساپ ءِ لوٹ کتگ –