گورکوپ ءَ نمیران بوتگیں سنگتاں دروت ندر کنیں – بی ایل ایف

بلوچ آجوئی لوٹوکیں سلاہ بندیں گل بلوچستان لبریشن فرنٹ ءِ جارکش میجر گوھرام بلوچ ءَ وتی آفیشل ٹیلی گرام چینل “آشوب ” تہ ءَ شنگ کرتگیں درشان ءِ تہ ءَ گورکوپ ءَ نمیران بوتگیں سنگت دروت ندر کُتگ ءُ گوشتگ کہ پاکستانی پوج ءِ گوم ءَ میڑ ءَ چار سرمچار نمیران بیتگ انت کہ آیاں گوں جوانمردی ءَ دُژمن پوج ءِ گوم ءَ جنگ داتگ – اے میڑ ءَ زورگریں پوج ءَ بُرزی کمک ھم گون بوتگ –

جارکش میجر گوھرام بلوچ ءَ میڑے سرجمیں ھال درشان ءِ تہ ءَ داتگ ءُ گوشتگ کہ ھمے سال دوھزار بیست ءُ سَے ءِ شانزدہ جنوری ءَ پاکستانی پوج ءِ چاریگ ءُ ڈرون بالگرداں کیچ ءِ دمگ گورکوپ ءِ رودرآتکی کوھاں ترّ ءُ گرد بندات کتگ، اے جاورانی گندگ ءَ پد سرمچار ھما دمان چہ وتی اوتاک ءَ دور شتگ اَنت ، ھما روچ ءَ روچ ءِ ایر روگ ءَ پیش یک ڈرونے ءَ اود ءَ سے میزائل آس داتگ، بلے سرمچاراں چہ آئی ءَ پیش آ جاہ یل داتگ بوتگ – شپ ءَ چاریگیں بالگردانی تَر ءُ گرد ءُ ڈرون ءِ سر ءَ بمبگواری ءِ سوب ءَ سرمچاراں آ ھند ءِ یل کنگ ءِ جھد کرتگ کہ تھاری ءَ دُژمن ھچ وڑ ءَ سوب مندی نہ رستگ – سرمچاراں کساں کسانیں ٹولی جوڑ کُتگ ءُ جتائیں نیمگ ءَ رھادگ بوتگ انت –

جارکش ءِ رِد ءِ کہ اے میان ءَ دو روچ ءَ تاں چاریگ ءُ ڈرون بالگردانی ءِ تر ءُ گرد برجاہ بوتگ انت –

میجر ءَ گوشتگ کہ ھبدہ جنوری ءِ سھب ءِ ادار یازدہ ءَ جنگی بالگرداں چہ اے اوتاک ءَ دور ھمے کوھانی سر ءَ کمانڈو ایر گپتگ انت گڑا سرمچاراں آیانی سر ءَ ترندیں اُرش بندات کُتگ، ھمے وڑ ءَ دُژمنیں پوج ءُ سرمچارانی میان ءَ یک دراجکشیں میڑے بندات بوتگ ءُ داں سے ادار ءَ برجاہ بوتگ –

آئی ءَ گوشتگ کہ اے میڑ ءَ دُژمنیں پوج ءِ باز کمانڈوے مرتگ ءُ زدگ بوتگ اَنت ءُ پہ ماتیں سرڈگار ءِ دیمپانی ءَ چار سرمچارعامر خان پنام عابد جان، یحییٰ جان پنام کمبر جان، رزا پنام ءِ گزین ءُ ممتاز ء قاضی پنام ءِ ملا یاسر نمیران بوتگ اَنت-

آئی ءَ گوشتگ کہ اے وھد ءَ ڈرون بالگرد ءَ سے میزائل آس داتگ سرمچار نشانگ کُت نہ کُتگ اَنت نمیرانیں عابد جان ءُ گزین جان ءَ تیوک ءَ یک یک تیرے لگ اِتگ بوتگ ، ھمے گمان کنگ بیت کہ آیاں گُڈی تیر وت ءَ وت جتگ ءُ نمیران بوتگ اَنت-

جارکش ءِ رِد ءَ عامر خان پنام عابد جان ء مِسکان جھمنند تجابان ھوشاپ سال دوھزار چاردہ ءَ سلاہ بندیں جھد ءَ ھمگرنچ بوتگ ءُ بیست ءُ چار دسمبر سال دوھزار ھژدہ ءَ بی ایل ایپ ءَ ھوار بوتگ، آ اے وھد ءَ گَل ءِ کیپٹن ءِ اگدہ ءِ سر ءَ بوتگ، آ یک وانندہ ءُ سْیاسی سوھوئیں ورنایے بوتگ، آئی ءَ کجام ھم ھند ءِ کہ ڈبہ دیگ بوتگ انت، اود ءَ آئی گوں ھندی مردماں جْوانیں وڑے ءَ نزیکی کتگ ءُ کار کُتگ-

یحییٰ خان پنام کمبر جان ء ڈاکٹر آسمی جھمنند پیدارک درملکول بنداتی دو سالاں شھری نیٹورک ءَ کار ءَ بوتگ، پد ءَ بیست ءُ پنچ مئی سال دوھزار بیست ءُ دو ءَ بلوچستان ءِ کوھاں سرمچارانی بنجلاں ھوار بوتگ، آ یک جْوانمرد ءُ جنگولیں سرمچارے بوتگ-

رزا پنام گزین ء واحد بخش جھمنند گورکوپ سالاچ سال دوھزار پانزدہ ءَ بی ایل ایپ ءِ راھبند ءِ رد ءَ سلاہ بندیں جھد بندات کُتگ ءُ داں شھیدی ءَ دُژمن ءِ بگیری ءَ مدام جھد ءَ بوتگ-

میجر گوھرام ءِ رِد ءَ ھمے میڑ ءَ ھم سنتیں گَل بلوچ لبریشن آرمی ءِ سرمچار ممتاز ء قاضی پنام ملا یاسر نمیران بوتگ کہ آ چہ سال دوھزار ھبدہ ءَ پہ بلوچستان ءِ آجوئی ءَ سلاہ بندیں جھد ھوار بوتگ ءُ وتی کرد ءَ پیلو کنگ ءَ بوتگ-

گڈسر ءَ جارکش میجر گوھرام بلوچ ءَ نمیرانیں بوتگیں سرمچار دروت ندر کُتگ ءُ گوشتگ کہ آیانی رتکگیں ھونانی بیر بلوچستان آجوئی انت ءُ آجوئی بلوچ ءِ تالہ اِنت، پرچہ کہ آ ھک ءُ راستی ءُ پہ سرڈگار ءِ پھازداری ءَ جنگ کنگ ءَ بوتگ اَنت، سوبمندی مدام راستی ءِ بیت انت –