استان بلوچ راج ءَ چہ وتی پُرایمنیں جھد ءَ دزکش کنائیت نہ کنت – ماما قدیر بلوچ

بلوچستان ءَ زورانسری آوار جنیانی بگیری ءَ وائس فار بلوچ مسنگ پرسنز ءِ زھرشانی بنجل برجاہ، زھرشانی بنجل ءَ مروچی چار ھزار ءُ نُھ سد ءُ بیست ءُ شش روچ سرجم بوتگ انت کہ کراچی پریس کلب ءِ دیم ءَ برجاہ بوتگ –

ھمے وھد ءَ پاکستان کمیونسٹ پاٹی ءِ جنرل سیکریٹری قاضی امداد، ہیومن رائٹس ءُ سوشل ایکٹیوسٹ نغمہ شیخ ءُ دگہ مردماں بنجل ءَ اتکگ ءُ بیگواھیں مردمانی کھول ءِ گوم ءَ دلپدردی درشان اِتگ –

نغمہ شیخ ءَ چہ بنجل ءَ ماما قدیر بلوچ ءِ گوم ءَ وتی اکس ءِ کش اِتگ ءُ ٹویٹر ءَ داتگ ءُ نبشتہ کرتگ کہ ماما قدیر بلوچ جھدءِ دومی نام انت کہ کراچی ءَ اتکگ – سال دوھزار سینزدہ ءَ کہ آئی بندات کُتگیں بنجل کہ ھنگت برجاہ بوتگ نوں کراچی پریس کلب ءِ دیم ءَ جتگ اش، بلوچستان ءُ درساں مستریں انسانی ھکانی جیڑہ زورانسری آوار جنی ءِ جنگ ءَ کنگ ءَ انت –

آئی ءَ دیمتر ءَ نبشتہ کتگ کہ ما چہ کراچی والھاں دزبندی کنیں کہ آ ماما قدیر ءِ بنجل ءَ بیا انت آئی ءِ گون ءَ یکجاھی درشان بہ کناں –

ھمے وھد ءَ گل ءِ کمک سرکماش ماما قدیر بلوچ ءَ گوشتگ کہ استان ءِ زوراکی ءُ زوگیری ءِ بگیری ءَ اے بلوچانی پنچمی جھد اِنت کہ یکشل ءَ برجاہ اِنت – پاکستان مرچی چہ سْیاسی ءُ مالی رد ءَ تباہ بوتگ کہ آئی ءِ سر ءَ ھمساھگیں ڈیھ بیسہ کنگ ءَ نہ اَنت ،اے استان پہ جھان ءَ گرانیں بارے جوڑ بوتگ استان ءَ چہ وتی تاکت ءَ بلوچ ایردست داشت نہ کرتگ، پہ بلوچ سرڈگار ءِ رکینگ ءَ بلوچ پسگاں وتی ھون ریتکگ اَنت-

آئی ءَ گوشتگ کہ بلوچ راج ءِ سر ءَ استان ءَ وتی درسیں پوجی زور چکاس اتگ اَنت، جھان ءِ زوراکی ءِ درسیں گوستانک سرگوز کرتگ اَنت، بے کساس زلم زوراکی کتگ کہ آھانی درور نیست – استان ءِ ادارہ چہ بیھار ءُ زور ءَ بلوچ ءَ چہ وتی پُرایمنیں جھد ءَ دزکش کرت نہ کنت، پاکستان ءِ درسیں ادارہ، پوج، پارلیمنٹ ءُ آئی نوکر ءُ بادشاہ چیردستیں راجانی پہ بربادی ءَ چن ءُ لانچ کنگ ءَ اَنت، ایردستی ءِ برجاہ دارگ چست ءُ ایر انت –