الندور کتاب جاہ ءَ دو سال سرجم بوگ ءَ نیاد ءِ برجم دارگ بوتگ

بلوچستان ءِ دمگ بلیدہ الندور ءَ الندور کتاب جاہ ءَ دو سال سرجم بوگ ءَ نیاد ءِ برجم دارگ بوتگ – الندور کتاب جاہ دو سال ساری بزاں سال دوھزار بیست ءَ آئی بنھشت ایر کنگ بوتگ ءُ مروچی آئی ءَ دو سال سرجم بوتگ انت- ھمے درگت ءَ نیاد ءِ برجم دارگ بوتگ ءُ نیاد ءَ میتگ ءِ نودر، ماسٹر، زھگاں ءُ کماشاں ھوار ھر تک ءُ پھناتاں سیادی داروکیں مردماں بھر زرتگ –

الندور کتاب جاہ ءِ نیمگ ءَ گوشگ بوتگ کہ مروچی سال ءِ اولی روچ بزاں یک جنوری اِنت ءُ اے روچ ءِ بندات ءَ جھان ءَ ھمک راج ءُ ھمک کس گوں دگہ رنگے ءَ کنت- چو کہ ما بلوچ راج ءَ گوں بندوکیں ءُ یک ایردستیں راجے ءِ بستار ءَ مئے روچانی بندات چو ھما راجانی وڑا بوت نہ کنت کہ آ آجو ءُ وتواجہ اَنت- بلے مئے جھد اِش اِنت کہ ما وتی روچاں انچیں رنگے ءَ بندات بکنیں کہ اے بندات پہ مئے باندات ءَ توجیلے بِہ سازیت ءُ مارا راہے شون بدنت-

نیاد ءَ مئے چاگرد، کتابجاہ ءُ جنرل کتابانی وانگ ءِ ارزشت ءُ بلوچ اسٹوڈنٹس ایکشن کمیٹی ءِ زھگانی تاک “گام” ءِ بنگپ ءِ سر ءَ تران کنگ بوتگ-

نیاد ءِ اولی بنگپ ءِ سرا میتگ ءِ وانگجاھانی استاد ءُ کماشاں تران کنان ءَ گشتگ کہ کتابجاہ پہ ھمک میتگ، ملک ءُ راجانی واستہ یک المی ایں چیزے کہ چہ آئی سوب ءَ میتگ ءِ ورنا ءُ زھگ چہ کَش ءُ گور ءِ ایدگہ سِلکاریاں رَک اَنت ءُ دلگوش ءَ گوں وانگ ءُ زانگ ءَ دینت ءُ وھدے کہ راجے ءِ ورنا گوں جھانی زانت، پلسپہ، سیاست ءُ لبزانک ءَ ھمگرنچ بوت اَنت گڑا آ راج ءَ دیمروئی کَنگ ءَ ھچ وڑیں تاگت داشت کت نہ کنت –

دیمترا جنرل کتابانی وانگ ءِ ارزشت ءِ سرا آھاں تران کنان گوشتگ کہ “پہ یک نودربرے ءِ ھاترا المی اِنت کہ درستاں چہ پیسر آ وتی پیلڈ ءَ گچین بہ کنت، بزانکہ آ کجام پیلڈ ءِ وانگ ءِ واھگ ءَ دار اِیت، یا کہ آ کجام پیلڈ ءِ مردم اِنت، آئی ابرمی تب ءُ لیکہ گوں کجام پیلڈ ءَ بندوک انت گڑا آ ھما کِشک ءَ گچین بہ کنت ءُ بنگیج ءَ ھمائی ءِ جھلانکیاں ایر بہ کپ ایت ءُ وتی گچین کتگیں پیلڈ ءِ وانگ ءِ ھواری ءَ آ جرنل کتاب ھم بوانیت کہ چہ آئی ءَ زانشتی معیار گیش بیت ءُ مجگ تاھیر زور ایت۔” چہ ایشی ءَ ابید جرنل مطالعہ کنگ ءِ سوب ءَ جھان ایندگہ زانت ءُ جھانی گوستانک ءِ سرا بازیں زانتے مردم ءَ دست کپیت-

دیوان ءِ دومی بنگپ بلوچ اسٹوڈنٹس ایکشن کمیٹی ءِ زھگانی تاک گام ءِ سرا کلکشان وانگجاہ ءِ بلوچی ءِ استاد عطاء الرحمن عطاء زھگانی تاک گام ءِ ارزشت ءُ آھی ءِ درگت زھگ سرپد کُت گوشت انت کہ مروچی ئیں زمانگ ءَ کہ ما گندگ ءَ ئیں وانگجاگاں زھگاں چہ آھانی راستیں بامرد ءُ کسہ آں دور بَرگ ءِ یک دِرچے برجاہ اِنت(کہ اشی آروک ءُ دیم ءَ بروک ءَ ما کل سرپدیں) کہ مروچی ئیں زھگ ءَ تو چاکر ءُ گوھرام، بانڈی ءُ مھناز ءِ باروا جست بکن داں ھچ سرپد نہ اَنت بلے اے آہانی مَیار نہ اِنت چیا کہ آہاں وانگجاھانی تہ ءَ محمد علی جناح ءُ علامہ اقبال وانینگ بوتگ اَنت ءُ آ چہ وتی راجی بامرداں پَراموش کَنگ بوتگ اَنت-

آئی ءَ تران کنان ءَدیمتر ءَ گوشتگ کہ اے زمانگ ءَ زھگانی واستا گام ءِ وڑیں تاکے چہ سوگاتے ءَ کمتر نہ اِنت کہ آ مئے دوئیں راجی زبان بلوچی ءُ براھوئی زبانانی تہ ءَ اِنت ءُ مئے زھگان ءَ مئے راجی زباناں ھوار مئے راجی بامردانی بابت ءَ زھگانی نبشتانک، شعر ءُ پٹ ءُ پول کتگیں چاچ ءُ بتل دست کپنت- ما بلوچ اسٹوڈنٹس ایکشن کمیٹی ءِ اے کار ءَ بائدیں کہ بِہ ساڑا اِنت ءُ آھانی دلبڈی ءَ بکنیں کہ آہاں چشیں مزنیں گامے چست کتگ-

بیاد ءِ گڑ سرا چہ الندور پبلک لائیبریری ءِ کتابی شیدائی آنی نیمگ ءَ اے پیسلہ کنگ بوت کہ ھمک ماہ ءِ تہ ءَ دو روچ لائیبریری ءِ تہ ءَوانگ ءُ زانگی لکچر نیاد برجم دارگ بیت – اے نیادانی مول ءُ مراد ورنایاں سر ءُ سوج کنگ ءُ آھاں چہ چاگردی نشہ ءُ ایدگہ سلکاری آں رکینگ ءُ وانگ ءُ زانگ ءِ نیمگ ءَ آرگ ءِ جھد کنگ بیت انت – پہ دیمتر ءِ لکچر دیواناں لائیبریری ءَ آؤکیں نودربرانی نام گچین کنگ بنت، ھمک نودربر وتی واھگے ءِ پد ءَ یک کتابے وان ایت ءُ آئیءِ “ریویو” ءَ دیوان ءَ تران کنت۔ کہ چہ ایشی ءَ نودربرانی تہ ءَ زانت ءُ زانگے ، سیکگ ءُ دربرگ ءُ گپ ءُ گال (مکالمہ) کنگءِ بود ءُ بودشتے پیداک بیت انت –

آھانی گوشگ ات کہ ما الندور ءُ بلیدہ ءِ ایدگہ دمگانی دراھیں نودربر ءُ رژنا پگریں ایدگہ زانتکاریں مردماں کتابجاہ ءُ آئی ءِ لکچر دیوانانی تہ ءَ بھر زورگ ءِ دزبندی ءَ کن ایں ءُ چہ آھاں ھمے امیت ءَ دار ایں کہ آ چاگرد ءِ بانداتانی دلبڈی ءَ کن انت ءُ کتاب کلچر ءِ مراگش ءِ دیمروئی دیگ ءِ ھاترا نودربرانی کمکءَ کن اَنت –