یوکرین ءِ بنجاھی شھر ءِ سر ءَ اُرش، سجوئیں شپ ءَ سائرن ءَ توار کتگ

روس ءَ یوکرین ءِ بنجاھی شھر کیئف ءَ گیشیں اُرش کرتگ پشمبے ءُ آدینگ ءِ میانی شپ ءَ بیوکیں اے اُرشاں بازیں ماڑیانی تباہ بوگ ءِ ھال اِنت ءُ دومی نیمگ ءَ سرکار ءَ جھمنندین مردماناں مھکمیں جاھاں روگ ءِ پرمان کتگ-

برطانیہ ءِ ھال سر کنوکیں روئٹرز ءِ رد ءَ داں انگت ءَ جاورھالانی تہ ءَ روس ءِ درستاں مستریں برزی اُرش لھتے اداراں پد دیم ءَ اتکگ-

رپورٹ ءِ رد ءَ شپ ءِ ساھت دو ءِ نزیک ءَ کیئف ءِ شپر ءَ سرکار ءَ ٹیلی گرام ایپ ءَ شیواری شنگ کتگ ءُ اشی ءِ ھواری ءَ ترس ءِ سائرن ھم چالو کتگ –

کیئف ءِ گورنر اولیکسکی کیوبیلا ءَ ٹیلی گرام ءَ گوشتگ کہ ’ڈرونز ءِ گون ءَ اُرش بوگ ءَ اِنت‘-

اشی ءَ لھتے دمان پیسر پشمبے ءُ آدینگ ءِ میانی شپ ءَ آئی ءَ وتی تران ءِ تامربند ءَ یوکرینی سروک ولادیمیر زیلنسکی ءَ گوشتگ ’ ایئر کمانڈز ءَ زرباری، رودراتکی ءُ روکپتی یوکرین ءَ 54 روسی میزائل ءُ 11 ڈرونز دور داتگ اَنت-

زیلنسکی ءَ اے گپ راست کتگ کہ ڈیھ ءِ گیشتریں دمگاں بجلی نیست اِنت، آئی ءَ گوشتگ ما جھد کنگ ءَ ایں بلے اے دمگاں بجلی ءِ شر کنگ باز مشکل اِنت-

آئی ءَ وتی پوجیانی ساڑایگ کنگ ءَ گوشتگ کہ آ اُرشانی دیمپانی ءَ کنگ ءَ اَنت-

روئٹرز ءَ پشمبے ءِ روچ ءِ لھتے ھنچیں تامر دزکپتگ کہ آیانی توک ءَ گندگ بیت اِنت کیئف ءَ گولہ باری ءَ تباہ بیتگیں لوگانی لمب اتگیں دیوالاں چست کنگ ءَ اَنت-

اشی ءَ پیسر واکداراں گشتگ اَت کہ پشمبے ءَ 120 میزائل شھر ءِ سر ءَ آس دیگ بیتگ اَنت-

یوکرین ءِ وزات دفاع ءَ گشتگ نوکتریں اُرشاں ھژدہ جھمنندی ءُ دَہ ماڑی تباہ بیتگ اَنت-

زانگ بہ بیت لھتے وھدانی توک ءَ روس ءِ نیمگ ءَ یوکرین ءِ گچینی جاھانی سر ءَ اُرشاں بجلی ءُ گیس ءَ زبھر اَنت ءُ اود ءَ ترندین سارتی ءِ سبب ءَ اود ءِ مردماں بازیں مشکلانی دیمپانی اِنت-