یونان ءَ روکیں دگہ یک بوجیگے بڈ اتگ، پانزدہ مردم بیران

یونان ءِ کوھے ءِ نزیک ءَ پشمبے ءِ روچ ءَ در پہ دری ءَ روکیں مردمانی بوجیگ ءِ بڈگ ءَ کم چہ کم پانزدہ مردم بیران بیتگ اَنت-

برطانوی ھبر رساں ادارہ روئٹرز ءَ کوسٹ گارڈز ءِ درور دیان ءَ گوشتگ کہ چار شمبے ءِ روچ ءَ پد بوجیگ ءِ بڈگے اے دومی وئیل اِنت کہ بھیرہ ایجیئن ءَ لیسبوس ءِ کوھ ءِ نزیک ءَ پیش اتکگ –

کوسٹ گارڈز ءِ رد ءَ بڈاتگیں بوجیگ ءَ چِل مردم سوار بیتگ اَنت ءُ اشانی توک ءَ پنچ مردم بچ اتگ اَنت-

کوسٹ گارڈ ءِ رد ءَ داں انگت ءَ پانزہ مردمانی لاش دزکپتگ اَنت ءُ دگہ بیست مردمانی شوھاز برجاہ اِنت – کوسٹ گارڈز ءِ رد ءَ بوجیگ لیسبوس ءِ رودراتکی پھناتاں بڈ اتگ ءُ کہ ترک ءِ زر ءِ نزیک ءَ کپ ایت-

وئیل ءَ پد یونانی ایئرفورس ءِ ھیلی کاپٹرز ءُ بوجیگاں کمکی کار بندات کتگ اَنت ءُ اے دمگاں مولمی جاور ھم ناگیگ اَنت ترندین گواتانی سبب ءَ کمکی کاراں جیڑہ ودی بیگ ءَ اَنت-