پاکستان ءُ انگلینڈ ءِ برجاھیں ھپت ٹی ٹوئینٹی گوازیانی سیریز زیک آسر بیتگ، زیکگیں گُڈی گوازی لاھور ءِ قدافی پَٹ ءَ لیب کنگ بیتگ، پاکستان ءَ ٹاس کَٹ اِتگ ءُ پیسر ءَ بالنگ کنگ ءِ پیسلہ کُتگ۔
انگلینڈ ءَ اولی بیٹنگ کنان ءَ بیست اورانی آسر ءَ 3 وکٹانی تاوانءَ 209 اڈ داتگ، انگلینڈ ءِ نیمگ ءَ جوانیں بیٹنگ کنان ءَ ڈیوڈ ملّان ءَ 78 رنز اڈ کُتگ وھدیکہ ھیری بروک ءَ 46 رنز اڈ داتگ۔ انگلینڈ ءِ لیبیانی دیما پاکستانی بالرزانی جاورھال سک نگیگ بیتگ اَنت، محمد وسیم ءَ چار اورزانی تہءَ 61 رنز داتگ۔
پاکستان ءَ انگلینڈ ءِ داتگیں 209 رنزانی ٹارگٹ ءَ سر بیگ ءِ ھاترءَ پَٹ ءَ ایر کپگ ءَ ھور پہ آیاں جاور نگیگ بیتگ اَنت پاکستانی کپتان ءُ بیٹسمن بابر اعظم ءُ محمد رضوان لیب ءِ بنداتی اورزانی تہءَ آوٹ بیتگ اَنت۔ محمد رضوان ءَ یک ءُ بابر اعظم ءَ چار رنز اڈ داتگ۔ پاکستان ءِ نیمگ ءَ شرتریں گوازی شان مسھود ءَ کُتگ ءُ 56 رنز اڈ کُتگی۔ پاکستان ءَ بیست اورزانی آسر ءَ 8 وکٹانی تاوان ءَ 142 رنز اڈ کُتگ ءُ چہ 67 رنز ءَ پروش وارتگ۔ انگلینڈ ءِ نیمگ جوانیں بالنگ کنان ءَ کرس ووکس ءَ 3 ءُ ڈیوڈ ویلی ءَ 2 وکٹ گپتگ۔
پاکستان ءُ انگلینڈ ٹی ٹوئینٹی سیریز ءِ گوازی لاھور ءُ کراچی پَٹ ءَ کنگ بیتگ اَنت کہ اشانی تہءَ سئے گوازی پاکستان ءَ وتی نام ءَ کُتگ وھدیکہ انگلینڈ چار گوزی ءَ باج بر بیتگ ءُ سیریز وتی نام ءَ کُتگ اِت۔