جمعیت اھل حدیث بلوچستان ءِ رھشون شیخ ایاز جھمنند تگران چہ کراچی ءَ بیگواہ کنگ بیتگ۔
جمعیت ءِ اھوالانی رد ءَ آ گوستگیں لھتے سالاں ھون ءِ شومک ءِ نادراھی ءِ آماچی ءِ سوب ءَ جاندراھی ءِ درگت ءَ یکشل ءَ کراچی ءَ شُتگ ءُ اَتکگ وھدیکہ انی ھم آ ڈاکٹر ءِ نیاد ءِ ھاتر ءَ کراچی ءَ شُتگ بیتگ کہ اود ءَ لیاری ءِ یک نادراھجاھے ءَ نشتگ بیتگ کہ 12اگست ءِ شپ ءَ ادار 2 ءَ پولیس ءُ سادگیں پُچ گوریں کارمنداں چِست کُتگ ءُ گوں وت بُرتگ۔
ایاز تگرانی ءِ پجار تربت ءِ نامئیں علماء کرام ءُ جامعہ اسلامیہ سلفیہ تربت ءِ کلانیں استادانی تہ ءَ بیت آ گوستگیں بازیں دھکاں چہ جامعہ اسلامیہ ءَ کلانیں استادے ءِ رد ءَ کار کنگ ءَ اِنت، ءُ یک مسیتے ءَ گوستگیں پانزدہ سالاں چہ امامت کنگ ءَ اِنت۔
آئی ءِ بیگواھی ءَ پد آئی نودربر ءُ پجاروکاں ھوار سیاسی گلانی تہ ءَ تُرس ءُ پریشانی گندگ ءَ کئیت۔
دومی نیمگ ءَ بنجاھی جمعیت اہل حدیث بلوچستان ءِ ناظم اعلیٰ مولانا عبدالغنی زامرانی ءَ وتی یک درشانے ءِ تہ ءَ گُشتگ کہ علماء کراماں چِست کنگ ءُ بیگواہ کنگ ءِ کرد ترسناک ءُ ایرجنگی اِنت، علماء کرام ءُ نیکراھی مدرسھانی نودربر پرایمنیں شھری اَنت آھانی بیگواہ کنگ ءَ چہ عالمانی تہ ءَ یک بے باوری ودی بیت اِنت ۔
آئی ءِ گُشگ اَت کہ شیخ ایاز نور تگرانی یک نامداریں نیکراھی عالم ءُ خطیب اِنت آئی ءَ کجام ھم ناشرکاریں گامگیجی ءَ گوں سیادی نیست آ نادراہ اِنت ءُ بازیں سالاں چہ کراچی ءِ ڈاکٹرانی گور ءَ پہ نیاد ءَ رؤت کہ آئی چیک اَپ بیت اِنت، آئی ءَ ابید کجام ھم سوب چِست کنگ ءُ بیگواہ کنگ سراسری زوراکی اِنت پمیشکا چہ بلوچستان سرکار ءُ سندھ سرکار ءِ زمہ واری بیت اِنت کہ آ مولانا ایاز تگرانی ءَ زیت ءَ زیت دیم ءَ بیار اَنت اگاں نہ ما زھرشانی کنگ ءَ لاچار بئیں۔
آئی ءَ گُشتگ کہ بلوچستان ءَ مردمانی بیگواہ کنگ ءِ یکشلی گوستگیں بازیں دھکاں چہ برجاہ اِنت، ابید کجام ھم سوب ءَ مھلوک ءِ بیگواہ کنگ ءَ چہ مھلوک ءِ تہ ءَ گیشتر بددلی ود اِتگ پمیشکا نوں اے یکشلی دارگ بہ بیت۔