گوریلہ جنگ
نبشتہ کار: ھُدا وشک ءُ مھمد پاروک بلوچ
دومی بھر
دی بلوچستان پوسٹ
ھمے وڑ ءَ 1955-75 ءَ ویتنام امریکہ ءِ بگیری ءَ وتی راجی چیرجنگ ءَ سوبین بوت ءُ چہ ھمے جنگ ءَ امریکہ ءَ وتی جنگی مول ءُ مُراد پیلو کت نہ کت انت۔ ھمے ڈول ءَ 1965-70 ءَ مسر ءِ پاگواجہ گامل ابدلناسر ءَ ھم وتی 70،000 لشکر ماں یمن ءَ پہ وتی پُلامرزی ئیں راجداری یے ءِ اڈ کنگ ءَ روان داتگ بلے مِسر ھم وتی لشکرکشی ءِ مول ءُ مُرادانی پیلو کنگ ءَ بے سوب بیتگ۔ ھمے وڑ ءَ 1971 ءَ بنگلہ دیشی مُکتی بانی ءَ پاکستان ءِ زورآوریں لشکر ءَ پْروش دات ءُ جھان ءِ اولی ءُ یکیں مزنیں اُلسی سرجھالی (لارجیسٹ پَبلکک سرینڈر) گیدی ءِ دیم راست کنائینت۔ ھمے وڑ ءَ مرچیگیں وھد ءَ، چَہ 2015 ءَ داں روچ مرچیگ ءَ سھودی اَرب ءِ سرکماشی ءَ مرچی یمن ءِ تہ ءَ چِل ملکانی لگوریں اَرب تپاکی گل کہ اَرب کولییشن پورس ئِے گْوش انت کسانیں ھوتیِانی چِیرجنگی گل ءِ دیم ءَ بے وانک انت۔
منی نبشتانک ھم ھمے دومی رنگیں راجی چیرجنگ ءِ بابت ءَ انت۔ ماں چیرجنگی جُنز ءَ راج وتی گالاں، چَہ وتی راجی زبان ءُ آشوب ءِ رِد ءَ نامے ایر کن انت انچوشکہ بنگالیانی چیرجنگی گل ءِ نام “مُکتیبانی” اَت کہ مانا ئِے “آجوئی ءِ جنگول” اِنت۔
ایراکی کُرد جنگولی گل ءِ نام “پشمرگا” اَت کہ مانا ئِے “پہ مارگ ءَ تیاریں لشکر” اِنت ءُ وتواجھی ءَ رند انگت ءَ نام ئِے ھمیش انت، یمنی شئیانی جنگولی گل ءِ نام “ھوتی” اِنت ءُ ھمے ڈول ءَ بلوچ راجی چیرجنگ ءَ جنگریزاں “ڈیھ ءِ سرمچار” گْوش انت۔ ھر چیرجنگی جُنز ءِ وتی راج ءِ چاگِردی، راجی دود ءُ ربیدگ ءُ دژمن ءِ تب ءِ ھساب ءَ وتی جتائیں مُسام ءُ رھبند بنت بلے لھتیں چیرجنگی شوندات ءُ کارگَلّ ھست انت کہ چَہ بے آیانی چیرجنگ ھچبر دیمروی نہ کنت ءُ ایشانی لھتیں درور ما جھل ءَ داتگ انت کہ ما یک یکی ءَ ایشانی سر ءَ درنگازی کن ایں۔
1: جنگی اُرُش ءُ ھکل
2: چیریں ھالکاری ءُ ھبکّہ کنگ
3: گوں وتی راج ءَ گوں رھوت دارگ ءُ لس مھلوک ءَ راجی جُنز ءِ سرپدی ءُ آگاھی
4: دژمن ءِ تہ ءَ تُرسے ودی کنگ
5: کوہ ءُ گیابان
6: چَہ درمُلکاں زَر ءُ جنگی کُمک
7: اُرُشانی بُنگیج ءُ اُرشانی تْرُندی۔
البت گُڈسری ما وتی نبشتانک ءِ تہ ءَ چیرجنگ ءِ بگیری ءَ ترامگیجانی بابت ءَ ھم درنگازی کن ایں کہ لھتیں مُلکاں وتی ھلاپ ءِ گْوریلہ جنگاں چون پْروش دات انچوشکہ ھندوستان، اسرائیل ءُ سری لنکا وڑیں مُلکاں وتی نیمگی ٹوھیں چیرجنگولاں پْروش دات۔
جنگی اُرُش ءُ ھَکل: ماں گْوریلہ جنگ ءَ زورگِر ءِ ھلاپ ءَ ھر وڑیں جنگی اُرُش روا اَنت کہ چہ ھمے اُرُشاں دژمن ءَ گیشتر تُرس ءُ زیانی آماچ بہ بیت۔ اے وڑیں اُرش ھبکّھی ءُ ھَکلیں اُرُش بنت انچوشکہ دگ ءُ شھدگاں درآمدیگی زورانسریں لشکر ءِ جنگی ءُ راشن ءِ پُجّائینگ ءِ کاروانان ءُ بُنجلانی سر ءَ اُرُش کنگ، پہ دژمن ءَ زَر زیانی یا اِکونومک لاز دیگ ءِ ھاتر ءَ دژمن ءِ اڈکتگیں ھر وڑیں انسٹالیشن ءُ سٹرکچرانی، ھاسکن زر کمائینگ ءِ ترامگیجانی تباہ کنگ باز زلوری انت کہ زورانسریں دژمن ءَ زیردستی مُھکم کنگ گِران کپ ایت۔ چیرجنگول گوں گْوارچی گُداں دژمن ءِ بُنجلانی سر ءَ اُرُش کن انت ءُ دژمن ءِ جنگی سِلاھاں پُل انت ءُ رند ءَ ھمے سِلاھاں دژمن ءِ بگیری ءَ کارمرز بہ کن انت۔ بزاں گوں بے گمان ءُ اناگاھیں اُرشاں دژمن ءَ ژند ءُ پند کن کہ دژمن ءِ تہ ءَ مُدام بیمے ودی بیت۔ وتکُشیں اُرُشانی یک جتائیں گلے ٹھینگ سک زلوری انت کہ دژمن ءَ بیگری سک باز ارزِشتیں شست (ھائی ویلو ٹارگٹ) پیلو بہ بنت۔
ھمے داب ءَ راجی کاسگ چٹّ ءُ راجدْروھانی(گدار) سر ءَ ھم اُرُش برجاہ دارگ سَک زلوری انت کہ مستریں دژمن تئی جِند ءِ راجی کاسگ چٹّ ءُ راجدْروہ( گدار) انت کہ یک درآمدیگیں دژمنے ءَ تئی سرڈگار ءَ سوھو کن انت ءُ پہ کاسگ چٹّی ءَ تئی دژمن ءَ چاگِردی ءِ بابت ءَ سرپدی ءُ تئی جنگی مراسا ءُ شَورانی ڈاہ ءُ ھالاں تئی دژمن ءَ سر کن انت چی ءَ کہ یک دگریں راجے ءِ لشکر ھما تئی زبان ءَ سرپد نہ بیت گُڑا چون تئی دمگ ءُ کوھاں سوھو بیت بزاں درآمدیگیں زورانسر چہ تئی راجدْروھاں کُمک زُور ایت ءُ ترا کُش ایت پمیشکا پیسر ءَ راجدْروھانی سر ءَ تُرسے ودی کنگ لوٹ ایت کہ دژمن ءَ کاسگ چٹّ ءُ راجدْروھانی دارگ گِران کپ ایت بلکیں تئی راج ءِ تہ ءِ کاسگ چٹّ دژمن ءِ کُمک ءَ مہ رو انت۔
روان اِنت—
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔