پاکستانی پوج ءَ گومازی ءَ بی آر سی تربت ءِ نودربر ءَ ھوار دو ورنا زورانسری آوار جتگ

دی بلوچستان اھوال پتر ءَ سربوتگیں ھالانی رِد ءَ بلوچستان ءِ دمگ تمپ گومازی ءَ پاکستانی پوج ءَ دوشی شپ ءِ کساس ادار دو ءَ گومازی ءَ گِسے ءِ سر ءَ بیڑ برتگ ءُ زوراکی کنان ءَ بی آر سی کالج تربت ءِ نودربرے ءَ ھوار دو ورنا زورانسری آوار جتگ ءُ گوں وت بُرتگ انت-

آوار جنگ بوتگیں ورنایانی پجار خالد ء منیر ، سلمان غفور ءِ نام ءَ چہ بوتگ انت –

اھوالکار ءِ رِد ءَ خالد بلوچستان ریزیڈینشل کالج ءَ دھمی تبک ءِ نودربرے کہ انی وتی چٹیاں گِس ءَ اتکگ بوتگ – اھوالکار ءِ رِد ءَ ھردو ورنا دو ماھے ءَ ساری زورانسری آوار جنگ بوتگیں ورنا شعیب ءِ کھول ءِ مردم انت کہ شعیب گوستگیں روچ ءَ چہ تربت ءِ بنجل ءَ یل بوتگ کہ دوشی شپ ءَ پد ءَ پوج ءَ بیڑ برتگ زوراکی کنان ءَ سلمان یکبرے ھمدا لوگ ءِ دپ ءَ سک باز لٹ شاپ کُتگ ءُ پد ءَ دویں ورنا آوار جتگ ءُ گوں وت برتگ اَنگ کہ انگت گار انت –

زانگ بہ بیت بلوچستان ءِ جتا جتائیں ھند ءُ دمگاں پاکستانی پوج ءِ زورانسری آوار جنیانی درچ یکشل ءَ برجاہ انت – کہ آھانی تہ ءَ کمے کساس ءَ مردم یل کنگ بنت ءُ پد ءَ دوسری آوار جنگ ءُ بیگواہ کنگ بنت- زورانسری آوار جنگ بوتگیں مردمانی تہ ءَ گیشتریں کچ نودربر ءُ ورنایانی ئیگ انت –