کیچ: بلوچ ازمکار شاھینہ شاھین ءِ کوشکارانی دزگیر نہ کنگ ءِ ھلاپ ءَ کیچ ءَ روانک، چاگردی رسانکجاھاں زھرشانی

بلوچستان ءِ دمگ کیچ ءِ بنجاھی شھر تربت ءَ پریس کلب ءَ شاھینہ شاھین کمیٹی ءِ نیمگ ءَ یک روانکے کشگ بیتگ ءُ روانک ڈی پی او ءِ کارگس ءِ دیم ءَ نندانک اش جتگ، اود ءَ آیاں لوٹ کرتگ ءُ گوشتگ یک سالے ءَ گیش گوزگ ءَ پد آئی ءِ کوشکار انگت ءَ ڈن ءَ ترگ ءَ اَنت –

دومی نیمگ ءَ کُشکاراں دزگیر نہ کنگ ءِ بگیری ءَ گوستگیں روچ ءَ چاگردی رسانکدر ٹوئیٹر ءَ یک کمپئینے برجم دارگ بوتگ چریشی ءَ چاگردی ءُ سیاسی مردم ءُ نودبراں بھر زرتگ ءُ شاھینہ شاھین ءَ انساپ دیگ ءِ لوٹ کتگ-

شاھینہ شاھین ءِ کھول ءِ گوشگ اِنت کہ شاھینہ شاھین آئی ءِ لوگ واجہ محراب گچکی ءَ کشتگ ءُ یک بلاھیں مردمے ءِ سبب ءَ چہ کانود ءِ پُنچگاں ڈن اِنت-

کھول ءِ رِد نامدپیں کُشکار محراب گچکی اے وھد ءَ کراچی ءَ اِنت ءُ سر زاھر ء گردگ ءَ اِنت ، دومی نیمگ کُشکار ءِ کھول نیمگ ءَ سُھل کنگ ءِ زور دیگ ءَ اَنت بلے اَسر کپتگیں کھول نیمگ ءَ چہ سُھل کنگ ءَ منّگ ءَ نہ اَنت سَھت ماں سَھت ءَ کُشکار ءِ دزگیری ءُ آئی ءُ سزا دیگ ءِ لوٹ کنگ ءَ اَنت ، ءُ انو اے لوٹانی سر ءَ گامگیج زورگ ءِ لوٹ کتگ-

زانگ بہ بیت شاھینہ شاھین ءَ پنچ ستمبر 2020 تربت ءَ آئی ءِ لوگ واجہ کُشتگ ءُ تتکگ – شاھینہ شاھین یک بلوچ آرٹسٹ ءُ ازمکارے، ٹی وی اھوالکار ءُ بلوچ زالبول ءِ اولی میگزین دزگھار ءِ جوڑ کنوک بوتگ-

تربت ءَ گوستگیں روچاں جسٹس فار شاھینہ شاھین کمیٹی ءِ یک دیوانے برجم دارگ بوتگ ، دیوان ءَ ھژدہ جنوری ءَ ضلعی پولیس آفیسر کیچ ءِ کارگس ءِ دیم ءَ نندانک جنگ ءِ شور جتگ ءُ نامدپیں کُشکار ءِ دزگیری ءُ ھکومت ءِ بے وسی ءِ بگیری ءَ سوشل میڈیا ءِ کمپئین برجم دارگ ءِ شور جتگ-