سبی ءَ پوج ءِ بیڑ، میڑ ءَ زھگ گوں مات ءَ بیران، پنجگور ءَ لاشے دزکپتگ

سر بیتگیں ھالانی رد ءَ بلوچستان ءِ دمگ سبی ءَ پوج ءَ یک لوگے ءَ بیڑ برتگ ءُ اود ءَ پوجی کارندھے بیران ءُ یکے زدگ بیتگ ءُ ھمے میان ءَ یک ورنایے وتی مات ءَ ھوار بیران بیتگ اَنت-

واکداراں ٹاہ داتگ کہ سبی ءِ دمگ لونی ءَ سلاہ بندیں مردمانی جاڑیگ بیگ ءَ پاکستانی پوج ءَ بیڑ برتگ ءُ اود ءَ پوجی بیڑ ءِ وھد ءَ تیرگواری بیتگ ءُ چریشی ءَ دو مردم کُشگ بیتگ اَنت ءُ ھمے میان ءَ یک ایف سی کارندھے بیران ءُ یکے زدگ بیتگ –

بیران ءُ زدگ بیتگیں ایف سی کارندہ سی ایم ایچ ھسپتال سبی ءَ برگ بیتگ اَنت، بیران بیتگیں ایف سی کارندہ ایس ایم رانا مھمد اسلم ءُ زدگ بیتگیں میجر انور کمال ءُ ھولدار رھمت اللہ ءِ ناماں زانگ بیتگ اَنت-

تیرگواری ءِ میان ءَ جنگ بیتگیں یک مردمے ءِ پجار پرویز ءِ نام ءَ زانگ بیتگ، کُشگ بیتگینانی تہ ءَ یک زالبولے ھوار اِنت-

دمگی مردمانی رد ءَ لوگ ءِ سر ءَ پوج ءَ بیڑ برتگ ءُ اود ءَ جاڑیگیں ورنایے ءَ گھگیری ءُ تیرگواری کرتگ چریشی ءَ پوج ءُ جانی تاوانی دیمپانی کنگ کپتگ، لشکری بنشوناں بیران بیتگیں زالبول ناشرکارے گوشتگ –

ھمے وڑ ءَ بلوچستان ءِ دمگ پنجگور ءَ یک مردمے ءِ لاش دزکپتگ کہ آئی ءِ پجار کمبر ء علی بخش ءِ نام ءَ زانگ بیتگ –

دمگی مردمانی رد ءَ اے مرد گوستگیں روچ ءَ سوروان ءَ سلاہ بندانی جنگ ءِ وھد ءَ مھیم سوروانی ھمراہ بیتگ ءُ زدگ بیتگ مروچی آئی ءِ لاش دزکپتگ –

زانگ بہ بیت گوستگیں روچ ءَ پنجگور ءَ سلاہ بندانی جنگ ءَ ڈیتھ اسکواڈ ءِ سروک مھیم سوروانی ءُ آئی ءِ ھمراہ اسد پرومی بیران بیتگ اِت اَنت –

اے مرد ءِ سر ءَ گوستگیں روچاں حفیظ قادر نامیں مردمے ءِ آوار جنگ ءِ بھتام ھست بیتگ –

لیویز ءَ رسانکدراں گوشتگ کک لیویز ءَ گوستگیں روچ ءَ چتکان ءُ پروم ءَ آوار جنگ بیتگیں حفیظ قادر ءُ منیر اھمد سوروان ءِ دمگ یک کاروائی ءِ میان ءَ سلاہ بندیں مردمانی میڑ بیتگ ءُ آ یل کنائینگ بیتگ اَنت ءُ چریشی ءَ دو آوار جنوکانی تہ ءَ دو مردم بیران بیتگ اَنت کہ آیانی پجار مھیم ء علی بخش ءُ اسد ء مسلم جھمنند پروم ھال سند سر ءِ ناماں زانگ بیتگ اَنت –

لیویز بنشون ءِ رد ءَ یک جرمکارے زدگی جاوراں تکگ ءُ آئی ءِ رندگیری ءَ لیویز کنگ اِنت –