کراچی ءَ بیگواھیں مردمانی ھاتر ءَ زھرشانی برجاہ

سند ءِ مزن شھر کراچی ءَ پریس کلب ءِ دیم ءَ بیگواھیں مردمانی پانکجنیں گل وائس پار بلوچ مسنگ پرسنز ءِ زھرشانی برجاہ، زھرشانی مروچی چار ھزار ءُ پنچ سد ءُ شست ءُ دو روچ سرجم بوتگ – کراچی ءَ چہ سیاسی ءُ چاگردی باسک میر حمل خان بلوچ، کامریڈ محمد ایوب بلوچ ءُ محمود دشتی ءَ بیگواھیں مردمانی کھول ءِ گوم ءَ دلپدردی درشان اتگ –

ھمے وھد ءَ بیگواھیں عبدالحمید زھری ءِ زھگ ءُ دگہ بیگواھیں مردمانی کھولاں ھوار بیگواھیں انسانی ھکانی باسک راشد حسین بلوچ ءِ مات ءَ بنجل ءَ اتکگ ءُ وتی زھرشانی نبشتہ کنائینتگ –

وی بی ایم پی ءِ رھشون ماما قدیر بلوچ ءَ اتکگیں مردمانی میان ءَ تران کنان ءَ گوشتگ کہ بلوچ شھیدانی ھون ءُ بلوچ ءِ پُرایمنیں جھد الم رنگ کاریت – اے شھیدانی ھون ءُ بلوچ جھدکارانی جوانیں کارشونیانی سوب ءَ ما وتی منزل ءِ نزیک ءَ رستگ اِنت –

ماما قدیر بلوچ ءَ گوشتگ کہ بلوچ راج ریاست ءِ زلم زوراکیانی آماچ انت ھمک روچ زانگولیں جون دست کپگ ءَ انت ءُ مردمانی زورانسری آوارجنی ءِ تہ ءَ بے کساس ءَ گیشی ارگ بوتگ – آئی ءَ گوشتگ کہ پوج سُرپُرانی تہ ءَ گیشی اتکگ اگاں ھمے وڈا انسانی ادارہ گُنگ ءُ کور بہ بنت گڑا بلوچ راج ءِ چکچینی ءِ دور ءَ اے ادارھانی مورخ ھم چہ اے ازاب ءَ رکیت نہ کن انت –