بلوچستان ءَ دگ ءِ وئیلاں دو مردم بیران ءُ چار زدگ

وئیل نصیر آباد، چمن ءُ دشت ءَ پیش اتکگ اَنت، وئیلاں دو مردم بیران ءُ چار زدگ بیتگ اَنت –

سر بیتگیں ھالانی رد ءَ دشت ءِ دمگ سبی دگ ءَ ترند رؤکیں گاڑی ءِ چَپ بیتگ، چریشی ءَ دو مردم بیران ءُ دو زدگ بیتگ اَنت –

لیویز بنشون ءِ رد ءَ وئیل ءِ ھال ءِ سر بیگ ءَ لیویز ءِ کارمند سر بیتگ ءُ بیران ءُ زدگ بیتگیں مردم چِست کنگ ءُ شال ءَ سرکاری نادراہ جاہ ءَ برگ بیتگ اَنت –

دشت ءَ بیران بیتگیں مردمانی پجار وحید اھمد ءُ طارق ءِ ناماں بیتگ اَنت ھردوک شال ءِ دمگ سٹلائٹ ٹاؤن ءِ نندوک گوشگ بیگ ءَ اَنت –

دمگی مردمانی رد ءَ ھرچاریں مردم مروچی پکنک ءَ دیم پہ بولان پیر غائب ءَ روگ ءَ بیتگ اَنت ناگتی گاڑی چَپ بیتگ –

ھمے رنگ ءَ چمن ءَ گریڈ ءِ نزیک ءَ یک پَرپٹ ءِ وئیل ءِ آماچ بیتگ ءُ چریشی ءَ یک ورنایے زدگ بیتگ –

زدگ بیتگیں ورناہ ءِ پجار نہ بیتگ آ سرکاری نادراہ جاہ ءَ برگ بیتگ –

ھمے رنگ ءَ نصیر آباف ءَ ٹول پلازہ ءِ نزیک ءَ رکشہ ءِ بریکانی فیل بیگ ءَ رکشہ چَپ بیتگ کہ چریشی ءَ یک مردمے زدگ بیتگ –

دمگی مردماں گوشت: وئیل ءَ پد زدگ بیتگیں مردم داں نیم ادار ءَ دگ ءِ سر ءَ کپتگ ءُ ھمے وھد ءَ پولیس اوشتوک بیتگ کہ آئی ءَ ھم تِکو نہ کرتگ –

دمگی مردماں گوشت مردمانی مُچ بیگ ءَ پد پولیس ءَ زدگ بیتگیں مردم چِست کرتگ ءُ نادراہ جاہ ءَ برتگ –

دمگی مردماں گوشت کہ شھر ءِ تہ ءَ چوشیں وئیل درپیش بنت پولیس نہ سُر ایت گڑا ڈن ءَ دراں وئیل آماچیں مردم چون چِست کنگ ءُ آرگ بنت –