نبشتانک: آ پہ تھاری ءَ کھرے اَت
نبشتہ کار: نگرھیں بام
دی بلوچستان پوسٹ
میتگ ءِ کنڈ کنڈ ءَ آیلہ ات گنوک ،ملنگ، شوانگ، مستری ھرچ لیکہ ءِ مردم پہ آئی ءَ سنگ پروشیں آسنے ات انت آئی ءَ مار ات کہ آجوئی ءِ چیدگ جھد انت انچیں جھد کہ مردم ءَ بے واب بہ کنت ، بے آرام بہ کنت ءُ بے لزت بہ کنت آئی ءِ کِر ءَ لزت بس آجوئی ئیگ اَت دگہ ھچ نہ اَت۔
آئی ءَ واب دیستگ ات کہ میتگ ءِ کبرستان ءَ پل رُستگ ، گلاب ءِ پُل ءُ اے پُل ھمروچ گیشتر ورنا بوگ ءَ انت ءُ گیشتر وشبو تالان کنان انت آئی ءَ واب ءِ توک ءَ دیستگ اَت کہ یک ماتے پہ وتی بچ ءَ کوکار کنگ ءَ اِنت انچیں کوکار اگاں ھدا ءَ گوش پِر بوتیں داں الم دلترک بوتگ اَت آئی ءَ واب ءِ توک ءَ دیست کہ آئی ءِ لوگ ءِ پیژگاہ گیشتر تھار بوان اِنت ءُ کش ءُ کِر ءِ مردم دْرست گار بوان اَنت، مران اَنت یک یک ءَ ھلاس بوان اَنت آئی ءَ واب ءِ توک ءَ دیست کہ تھاری پہ آئی ءَ مانپوشان اِنت ءُ پیداک اِنت آئی ءَ ترس دل ءَ اتک کہ تھاری آئی ءَ ایر مبارت ، آ بے تاھِیر بوان اَت سر سر جنگ ءَ اَت ھمے سرسر جنان ءَ گوں آ چہ وابءَ گُڑ اِت ءُ نشت ءُ پد ءَ گوں زوراں گریوگ ءَ لَگ اِت ۔ گریوان گریوان دیر ءَ پد وت ھاموش بوتّ۔
اے ھاموشی پہ آئی ءَ رژن ءِ سکینے اَت آئی ءِ رتکگیں ارساں تھاری ءِ ھلاپ ءَ جنگ ءِ جار جتگ ات گوں ترس ءَ جنگ ءِ جار آئی ءَ رژن ءِ شوھاز ءَ درکپگ ءِ پیسلہ کتگ ات ۔ پد ءَ آئی ءَ جھد بندات کت بازارانی توک ءَ جاک کوکار میتگ ءِ دیوالانی سر ءَ چاکنگ کنگ ءُ ھون ءَ باریں پوسٹر لچینگ بندات کت۔ میزان میزان ءَ دیوالانی سر ءِ چاکنگ ءُ پوسٹر گیشتر بوان بوت انت ۔
وھدے اے ھال واجہ کار سردار ءُ نواباں سر بوت داں آ بے تاھیر بوت انت۔ واجہ کاراں وتی سپائیگ ھکم دات اَنت کہ ھرکس چہ تھاری ءَ سِدگ لوٹ اِیت آ ترسینگ بہ بیت، بیگواہ کنگ بہ بیت، لالچ دیگ بہ بیت انگت آ سرپد نہ بوت انت گڑا آ کشگ بہ بیت ۔ واجہ ءِ ھکم ءَ گوں آئی ءِ بازیں ھمراہ بیگواہ کنگ بوت انت ، بازینے کشگ بوت ءُ بازینے در پہ در کنگ بوت بلے آ شیر زالے اَت تھاری ءَ چہ درکپگ ءِ سوگند وارتگ ات ئِے چوں واجہ ءِ ھکم منگ ءَ تیار بیت آئی ءَ واجہ ءِ ھکم ءِ پسہ گوں گیشتر کوکار ءُ گیشتر جاک ءَ دات داں تھاری ءِ ھلاپ ءَ جنگ ءَ وتی دروشم بدل کت گڑا آئی ءِ بازیں ھمراہ باگی بوت اَنت سنگر کوہ گیابان کت انت دیوالانی چاکنگ ءُ پوسٹرانی ھمرائی ءَ بمب ءُ ٹوپ ھم ھمراہ کنگ بوت انت ءُ جھد دیم ءَ روان بوت۔
انچو جھد زوردار بواں بوت گڑا کوکار ءُ جاک پہ واجہ کاراں سگگ نہ بوت انت گڑا واجہ کاراں آئی ءِ میتگ ءِ سر ءَ ارش کُت، آئی ءِ گس بُن اِش دات ءُ میتگ چہ کیمیکل گیساں اشکر کُت ۔ آئی ءِ سر ءَ تژب جنگ بوت کہ آ مئے دین ءِ ھلاپ ءَ مردماں گمراہ کنگ ءَ اِنت آ دین دشمنے آ مئے زالبوالاں چہ پردہ ءِ پاکیں ھیال ءَ بددل کنگ ءَ انت، پد ءَ آئی ءَ سنگر بدل کت انت یک میتگے ءَ چہ دو میتگ ءَ چہ سے میتگ انچو آ روان ءُ رژن تالان کنان ات آ پہ تھاری ءَ کھرے ات آئی ءَ واجہ کارانی واب ھرام کتگ ات۔
وھدے آئی ءِ سر ءَ واجہ کارانی سپائیگ چو کچک ءَ کپ اَنت گڑا آ میتگ ءِ یل کنگ ءَ لاچار بوت میتگ ئِے بدل کت سنگر ئِے بدل کت انت بلے جھد ئِے برجم داشتگ ات واجہ کارانی زلم ءُ زوراکیاں آ گیشتر مُھر کتگ ات آئی ءَ وتی میتگ ءِ کبرستان ءَ کبر بوگ ءِ واب دیستگ ات وتی زمین ءِ دلبند ءَ ایر روگ ءِ واب دیستگ ات۔
آئی ءَ مُھر بوگی ات وھدے جھد تیز بوت واجہ کارانی سپائیگ گیشتر بوان بوت انت داں انچیں وھدے اتک کہ زانتکار ءُ پگر کنوکیں مردم واجہ کاراں درچت ءُ کشت انت درچت ءُ بیگواہ کت انت واجہ ءِ زلم ءِ ھلاپ ءَ روانک کشگ بوت روڑ بند کنگ بوت انت شد ھڑتال کنگ بوت دراں ڈیھ بوت انت ءُ آ ھم دراں ڈیھ بوگ ءَ لاچار بوت ۔
پد ءَ آ میتگ ءَ واتر نہ بوت ، آئی ءِ واتر نہ بوگ ءَ ھمک گس ءَ شیرزالے ودی کت ءُ پد ءَ وال چاکنگ ءِ پگر دیم ءَ روان بوت دیوالانی سر ءَ پوسٹر لچینگ بوت انت پد ءَ پمپلیٹ میتگ ماں میتگ لوگ ماں لوگ بار کنگ بوت انت ءُ ھرچ گس ءَ تھاری ءِ ھلاپ ءَ شیر زالے روڑانی سر ءَ راہ دیگ بوت۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔