جھانی وبا کرونا وائرس ءِ نادراھی ءَ یک مردمے بیران، چاردہ نودربراں ھوار دگہ شست کرونا نادراھی ءِ کیس دیم ءَ اتکگ

دی بلوچستان پوسٹ

بلوچستان ءَ جھانی وبا کرونا وائرس تیزی ءِ گون ءَ تالان بوگ انت بیست ءُ چار ادارانی میان ءَ چاردہ نودربراں ھوار شست دگہ نوکیں نادراھانی کیس دیم ءَ اتکگ – وھدیکہ کرونا وائرس ءِ آماچ بوتگیں یک دگہ مردمے بیران بوتگ –

جان سلامتی بلوچستان ءِ شنگ کرتگیں رپورٹ ءِ رِد ءَ پنچ شمبے ءَ بلوچستان ءَ ھپت سد ءُ چار مردمانی کرونا ٹیسٹ کنگ بوتگ، اے ٹیسٹاں چہ بلوچستان ءَ شست دگہ نوکیں نادراہ دیم ءَ اتکگ چریشی ءَ پد بلوچستان ءِ تہ ءَ درستی کرونا وائرس آماچ بوتگیں نادراھانی کچ شانزدہ ھزار شش سد ءُ چل دو ءَ سر بوتگ اَنت –
رپورٹ ءِ رِد ءَ بیست ءُ چار ادارانی میان ءَ نوزدہ نادراھانی جاندراھی ءَ پد تنی وھدی بلوچستان ءِ تہ ءَ پانزدہ ھزار نُھ سد ءُ شست ءُ یک مردمانی جاندراھی کنگ بوتگ اَنت –

جانسلامتی رپورٹ ءِ رِد ءَ جھانی وباء کرونا وائرس ءِ سوب ءَ بلوچستان ءِ تہ ءَ یک دگہ نادراھے بیران بوتگ – چریشی ءَ پد بیران بوتگیں مردمانی کچ یک سد ءُ پنجاہ ءُ ھشت ءَ سر بوتگ انت –

جانسلامتی بلوچستان ءِ رپورٹ ءِ رِد ءَ بلوچستان ءِ وانگجاھاں چہ دگہ چاردہ نودربرانی کرونا ٹیسٹ پوزٹیو اتکگ اَنت اے ٹیسٹاں پد بلوچستان ءِ وانگجاھانی تہ ءَ جھانی وباء کرونا وائرس ءِ آماچ بوتگیں نودربرانی کچ ھشت سد ءَ نود ءَ یک ءَ سر بوتگ اَنت –

جانسلامتی رپورٹ ءِ رِد ءَ بلوچستان ءِ تہ ءَ بیست ءُ چار ادارانی میان ءَ دوسد ءَ ھشتاد یک مردمانی ٹیسٹ کنگ بوتگ اَنت –