دیوانے گوں ناکو مُراد بکش ءَ- سفر خان بلوچ

نبشتانک دیوانے گوں ناکو مُراد بکش ءَ

سرھال:- بی ایس او آزاد ءِ کونسل سیشن

سفرخان بلوچ

دی بلوچستان پوسٹ

من ءُ ناکو مُراد بکش بازار ءَ ھُوٹل ءَ نشتگ اِت آں ءُ شیر چاھے مئے دیم ءَ اَت کہ ناکو ءَ ناکو پیزُک ءِ سَوتے چالو کُت۔ سَوت ءِ ھلاسی ءَ ھوار ءَ ناکو ءَ منا جُست کُت سفر نوکیں چے ھال ھست رسانک در ( میڈیا ) ءَ مروچی باندا ؟
من گوں لھمے بچکندے ءَ پسّو ترّینت ءُ گْوشت، ناکو ھاسیں ھِچّ نیست ، بس بی ایس او آزات ( آزاد ) ءَ وتی لس مجلس ( کونسل سیشن ) کُتگ ءُ نوکیں نام دیم ءَ اتکگ اَنت ۔ نوکیں ھال ھمیش اِنت منی ھیال ءَ تو اے ھال ءَ پیسر ءَ سرپد بوتگ ئے۔ ناکو ءَ چادر چنڈّ اِت ءُ گوں شاکارگے ءَ پسّو دات ، ھو من سرپد آں کہ رسانک در ءَ یک بیانے ونتگ اَت۔
من پہ اجکّھی ناکو جُست کُت ، گُڑا ناکو تئی ھیال چی انت اے کونسل سیشن ءِ بابت ءَ؟
ناکو ءَ پہ تھلیں بچکندے پسّو ترّینت ءُ گْوشت ، بچار سفر جان من وَ دِگہ ھِچّ ءَ سرپد نہ آں، بس ھمے بیان ونتگ ۔ بس ھمینچو تو زان ئے ھمینچو من۔
من گْوشت ناکو بچار تئی اُمر چہ منی ءَ مزن اِنت ، تو دُگنیا ءُ سیاست گیشتر دیستگ۔ چہ من ءَ گیش زان ئے ، بس تو گپ کم کن ئے۔
ناکو ءَ پد ءَ کندگے لُنٹاں مُشت ءُ گْوشت ، بچار من گپ کن آں ترا وش نہ بیت، گپ نہ کن آں ھم ترا وش نہ بیت ۔ من کہ گپ کن آں تو چو سِندھی کُروس ءَ منی سر ءَ جنگاں کُروسو بہ ئے، گپ نہ کن آں تو گْوش ئے من گپ نہ کن آں ۔ سفرو تو آسے نہ آپے ، تئی ساری ءَ بِہ بیت مردُم یا رند ءَ مانا یک۔
من ءَ کندگ ءَ گِپت بلے من نہ کند اِت ءُ گْوشت ، ناکو تو وتی گپّاں بہ کن من ھِچّ نہ گْوش آں۔
ناکو ءَ گْوشت سفرو من زان آں تو منی گوم ءَ پد ءَ دلگران بہ ئے ، من ء پیریں مُراد بکش پد ءَ کُجا پَل پہ پَل ترا بِہ پٹّان ءُ تئی پاداں بہ کپاں ترا وشاں بہ کن آں۔
من گْوشت ناکو چوش نہ بیت ، تو وتی گپّاں بہ کن۔ تو چے کہ گْوشگ لوٹ ئے ، گوں ترا تِپاک کنگ نہ کنگ آ منی وتی لیکہ ءَ گوں کار دار اِیت ، زلوری نہ اِنت تو ھرچی بِہ گْوش ئے من چو میش ءِ سر ءَ جھل ءُ گوں تو تپاک بہ کن آں۔
ناکو ءَ پہ مھروانی گْوشت ، ھو سفر جان اے ھکّ ھرکس ءَ ھست اِنت ءُ ھرکسی وتی لیکھے بیت ، زلوری نہ اِنت ھرکس گوں دومی ءَ تپاک بہ کنت۔ اگاں تو منا جُست کن ئے کہ بی ایس او آزات ( آزاد ) ءِ کونسل سیشن ءِ بابت ءَ تو چے گْوش ئے ، بچار اے سیشن ءِ بابت ءَ من چے بِہ گْوش آں! من وَ بس بِیان ونتگ ، پد ءَ بِیان ءِ تھنا ٹائیٹل ءِ وانگ ءِ ھاتر ءَ من سئے رند ءَ لبز بلد چار اِتگ ۔ سرجمیں بِیان ونت ءُ ھلاس کُت ، یک جگے آپ وارت۔ چوش کہ بِیان ءِ مانا ھمیش اِنت تو وتی گپّاں راج ءَ سر کنگ لوٹ ئے ، یکّے و مئے مھلوک تھنا اردو ءِ سْیاھگ ءِ وانگ زانت۔ پد ءَ چوش کہ ایشاں اردو چہ اسکول ءَ گیش انڈئن تامُر چار اِتگ در بُرتگ، پد ءَ ایشاں ھُدا بزانت میر تقی میر ءِ شیئر ونتگ اَنت یا فیض احمد فیض ءُ دِگہ کئی اردو ءُ فارسی شیئر ونتگ اَنت انچیں گْرانیں اردو کہ آیانی مانا ھُدا بِہ گیت نود ءُ پنج درسد 95%مردُم ءَ گیش سرپد نہ بیت ، گُڑا تو چوں وتی کلوہ سر کتگ۔ یکّے و مئے بلائیں نادراھی ءِ اِش اِنت کہ ما چار کتاب مارکس ازم ءِ ونت مارکسٹ بن مارکس ءِ ارواہ مئے باتِن ءَ کیت ، چار کتاب ما لینن ءُ مارکس ءِ وانت مئے جبین ءَ مارکس ءُ لینن ءِ دوئینانی ارواہ کیت۔ پد ءَ مارا مارکسٹ ءُ لینن لسٹ دوئیں بن، ءُ ما اگاں شائِری بِہ وان آں گڑا فیض ،حیبب جالب، غالب ءُ میر تقی میر ءِ ارواہ مئے باتِن ءَ ایر کپ اِیت ءُ پہ مُدامی جاہ کنت ، بلے ما تنی وھدی گُپتار ءُ رپتار ءَ نہ زان اِیں کہ گُپتار چی بہ بیت ءُ رپتار چی بہ بیت ۔ دومی وَ چیئرمین زانگ نہ بیت بانُکے یا واجھے! چی ءَ کہ نام ابرم ءُ پد ءَ چیئرمین اِنت۔ ابرم نام مونث یے بزان ابرم جِنکی نامے، پد ءَ چیئرمین اِنت۔ چیئرپرسن بوت کنت ، بلے چیئرمین منی ھیال ءَ بوت نہ کنت ۔
من کہ نہ زان آں ابرم بانُکے یا واجھے! گُڑا من ء ناکو چی ءَ گپ بہ کن آں ؟
من گْوشت ناکو بچار دِگہ من ھِچّ نہ گْوش آں ، بلے ھمے نام ابرم ءِ گپ ءَ من گوں تو تپاک نہ کن آں ، یکّے وَ پاکستان ءَ وتی دست شُشتگ اَنت ایشانی دُمب ءَ کپتگ ، پد ءَ تو گْوش ئے من نہ زان آں ابرم کَے اِنت، تو پرچا بِہ زان ئے؟
ناکو ءَ گْوشت ، بچار سفر جان راستی ءِ باریگ ءَ اِژم مگر ءُ جزباتی مبُو ،، یک کِسّھے کاراں کہ وھدے کپودر پِشّی ءَ گِند اِیت گُڑا وتی چماں بند اِیت کہ پِشّی من ءَ گِندگ ءَ نہ اِنت ، بلے پِشّی کَیت کپودر ءَ وارت،، تو سرپد ءُ سوھوئیں ورناھے ، من اے بابت ءَ دِگہ گیشیں گپ نہ کن آں ۔
من وَ اے بابت ءَ دِگہ ھِچّ گپ نہ کُت ، بلے من ناکو ءَ را گْوشت بچار ناکو بی ایس او ءِ ماں بلوچ راجی جنز ءِ تہ ءَ بلائیں کِردے ھست،
ناکو ءَ چِست ءُ چابُک ءَ گْوشت، ھو! بی ایس او ءَ ھمینچو جھد کار پیداک کُتگ ءُ ھمنیچو پارلیمنٹ پرست ھم پیداک کُتگ۔ بی ایس او ءِ بندات ءَ بگر داں روچ ء مروچی بیا لکّ ءُ ھزارانی کچ ءَ آئی ورکر بوتگ اَنت ، آ ورکرانی گیشتری نیم نالائِک ءُ نابود بوتگ اَنت،
من گْوشت ناکو من بی ایس او آزات ( آزاد ) ءِ گپ ءَ آں ، دگہ بی ایس او ءِ نا؟
ناکو ءَ گْوشت ھو! اے گپ ءَ یک ھدے ءَ تِپاک کن آں کہ بی ایس او آزات ( آزاد ) ءَ بلوچ راجی جُنز ءَ را کمبر چاکر ءَ ھوار دِگہ ھزاراں بچّ داتگ کہ آیاں وتی جان ندْر کُتگ بلے چہ لیکہ ءَ پُشت ءَ نہ کِنز اتگ اَنت ۔ زاکر جان ، زاھد بلوچ ءُ شبیر لکمیر ءِ دابیں ورنا داتگ کہ آ انگت زِندان ءِ تھاریں کُوٹی ءَ رُژن ءِ پُولگ ءَ بندیگ اَنت، بلے چہ لیکہ ءَ پدگرد نہ اَنت ۔ ڈاکٹر اللہ نذر بلوچ ءُ بشیر زیب ءِ پیمیں رھشونے داتگ ، بلے اے کْوھنیں کِسّہ اَنت۔ اِیشانی پیمیں بچّ اے زوتاں من نہ دیستگ کہ دیم ءَ بیا اَنت ءُ نِزوریں کُوپگاں گْرانیں بار بِہ لڈّ اَنت۔
من گْوشت نا ناکو چوش نہ اِنت ، بی ایس او آزات ( آزاد ) انگت ھما بی ایس او آزات اِنت۔ اے وھد ءَ ھم سدانی کچّ ءَ ورنا چہ بی ایس او آزات ءَ تیار بُوَگ ءَ اِنت، تو اے ھم گْوشت کن ئے کہ اے وھد ءَ بی ایس او آزات ءَ یک سکینڈ لیڈر شپ ءِ لڑے تیار کُتگ ءُ آ باندا راجی جُنز ءِ گْرانیں بار وتی کوپگاں زُرت کنت ۔
ناکو ءَ گْوشت لھتیں تئی پیمیں نالائِکیں زھگ الم پیداک کُتگ ئے کہ آ تنی وھدی راجکاری ءِ مانا ءَ سرپد نہ اَنت، دگہ لھتیں شیخ چلی ءِ پیمیں مردُم کہ پچیں چمّاں واب گند اَنت دگہ ھچ ۔

من گْوشت تو من ءَ شیخ چلی ،نابود ءُ نالائِک گْوشت ؟
ناکو ءَ گْوشت ھو ترا شیک چلی ، نابود ءُ نالائِک گْوشت ، تو وتی بودناکی ءُ لائِکی ءِ یک کارے پیش دار ، من ترا کدی نالائِک نہ گْوش آں ، اگاں گْوشت ناکو ءِ زُبان ءَ بُرّ۔
گوں ناکو ءِ اے گپّاں منی دپ پچ بوت ءُ من ھچ گْوشت نہ کت۔
ھمے وھد ءَ ناکو ءَ ھوٹل ءِ بار والا توار کُت چاھانی زر دات اَنت ءُ گوشت ، وھد لیٹ بُوَگ ءَ اِنت بُرواں کاشُکے زوران ءُ دیم پہ گس ءَ رو اِیں ، بلے شپ ءَ بیا منی ءَ من ترا بٹ ءُ کاشک واریناں۔ ناکو ءَ ٹھکے دات ما دیم پہ مائیگ ءِ مارکیٹ ءَ رھادگ بوت اِیں ، راہ ءَ من گْوشت ناکو بانک کریمہ بی ایس او ءِ گْوستگیں چیئرپرسن ءَ بی این ایم جوائن کتگ ۔
ناکو ءَ گْوشت ھو سئے سال ءَ نِشتگ ءُ ٹوٹلے جتگ کہ من ءَ کُجام پارٹی جوائن کنگی اِنت ، پد ءَ پارٹی ھم یکّے انوگیں امریکی صدر ءِ واھگ دار جون بائیڈن (اے دیوان ھما وھد ءَ بوتگ امریکی گچین کاری چلگ ءَ بوتگ اَنت اے وھد ءَ پیسلہ ھم نہ بوتگ کہ امریکی صدر کے بیت) 29 سال ءِ اُمر ءَ اولی رند ءَ امریکی گانگرس ءِ باسک جوڑ بیت ، مئے کرّا داں 33 سال ءَ مھلوک اسٹوڈنٹ لیڈر بَہ اَنت۔ پد ءَ سئے سال ءَ جیڑ اَنت کہ نوں وتی راجکاری کُجام دیم ءَ برگی اِنت، انگت تو گْوش ئے کہ ناکو تو گپ کن ئے۔
ما مائیگ ءِ مارکیٹ ءَ سر بوتاں ناکو ءَ مائیگ زُرت ءُ دِگہ لھتیں وردنی سامان ءِ زرت ءُ من گوں ھالیگیں دستاں ناکو ءِ پرپٹ ءِ پُشت ءَ سوار بوت آں دیم پہ گِسانی نیمگ ءَ۔

دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔