مشکہ ءُ ڈیرہ بگٹی ءَ پاکستانی پوج ءَ چار مردم آوار جتگ

سربیتگیں ھالانی رِد ءَ بلوچستان ءِ دمگ مشکہ ءُ ڈیرہ بگٹی ءَ پاکستانی پوج ءَ زوراکی کنان ءَ چار مردم آوات جتگ ءُ بیگواہ کرتگ –

دمگی مردمانی رِد ءَ گوستگیں روچ ءَ مشکہ ءِ دمگ تردان منگولی ءَ پاکستانی لشکر ءَ بیڑ بُرتگ ءُ زوراکی کنان ءَ سَے مردم کہ آیانی پجار کادر بکش، اسھاک ءُ گاجیان ءِ ناماں بیتگ اَنت ءُ دزگیری ءَ پد ناشناسیں زنداناں برتگ اَنت –

ھالانی تہ ءَ گْوشگ بیتگ کہ لشکر کشی ءِ میان ءَ پاکستانی لشکر ءَ چُک ءُ زالبول لٹ ءُ کُٹ کُتگ انت آیانی سر ءَ زوراکی کُتگ درگان درگان کتگ انت ءُ آ زور داتگ انت کہ لشکری بنجلے نزیک ءَ جاھمنند بہ بہ اِت –

دومی نیمگ ءَ بلوچستان ءِ دمگ ڈیرہ بگٹی ءَ گوستگیں روچ ءَ پاکستانی لشکر ءَ لنجو سگاری میتگ ءَ لوگے ءِ سر ءَ بیڑ بُرتگ ءُ زوراکی کنان ءَ چُک ءُ زالبول ترس ءُ بیم داتگ انت ءُ نبی بکش ء جیندا چاکرانی آوار جتگ ءُ برتگ –

دومی نیمگ ءَ شال ءَ بیگواھی مردمانی درگیجگ ءِ ھاتر ءَ وائس فار بلوچ مسنگ پرسنز ءِ زھرشانی بنجل برجاہ اِنت ءُ ائید ءِ روچ ءَ وائس فار بلوچ مسنگ پرسنز ءِ نیمگ ءَ شال ءِ پریس کلب ءِ دیم ءَ زھرشانی ھم کنگ بیتگ –