آزمانک: زمین ءِ شے مُرید
آزمانکار: ماہین بلوچ
دی بلوچستان پوسٹ
ماہکانیں شپ سک زیباہ انت ماہکانیں شپ منی بہ تاھیریں دل ءَ جتائیں تاھیرے بکشائیت ءُ منی درستیں گم ءُ رنجاں وتی رژناہی ءِ تہءَ گار کنت۔
ماہکانیں شپ من ءَ دوست ھمے واستہ بیت کہ گوں ماہکانیں شپ ءَ منی وشیں ساہت بندوک اَنت۔ آ شپ ءَ کہ من گوں آئی ءَ نشتگ اَت آں ءَ آ گپ جنگ ءَ اَت ءُ من بس آئی ءَ چارگ ءُ گوشدارگ ءَ اَت آں۔ آئی ءَ گپ گپ ءِ توک ءَ ھیال کُت کہ من آئی ءَ سک چارگ ءَ آں، گُڈا من ءَ جُست ئے کت کہ چے بوت؟
من بچکند اِت ءُ پسہ دات ھچ۔۔۔ تو بس انچو گپ جن۔
پدا من گوں وت گپ بنا کُت ءُ گُْشت یا ھُدا منی سْیاہو داہم ہمے رنگ ءَ وش ھال بات ءُ بہ کندات۔
ما داں دیراں نشت ءُ گپ جت۔ ماہکانیں شپ مئے مہراں گوں گیش ڈولدار اَت۔
بلے اے ساہت ءَ آئی ءَ منی مارشت نہ مار اِت اَنت آئی ءَ اے گپ ھچ بر نہ جیڑ اِت کہ من آئی ءَ چو گنوکانی داب ءَ دوست داراں آئی ءَ من ءَ بس یک شوکیں سنگتے ءِ ھساب ءَ چار اِت ءُ من ہم ھچ بر آئی ءَ را نہ گْشت کہ من ءَ تو دوست بئے من ءَ گوں تو مہر اِنت چوشکہ منی ھیال ہمے بیتگ کہ آ من ءَ چہ باز شرتر ءُ لاہک تر انت۔
وھد گوزان بوت ءُ منی مہر گیش مُہکم بوت پہ آئی ءَ، پنچ سال سرجم بوت ءُ آئی ءَ ہم گوں من مہر بوت ءُ آئی ءَ ہم من ءَ گُْشت نہ کُت کہ من ءَ گوں تو مہر اِنت انچو وھد گْوَست ءُ مئے راہ جتا بوت اَنت آ پہ زمین ءِ عشق ءَ شے مُرید بوت ءُ من پہ آئی ءَ ھانی بوت آں ءُ داہمی آئی ءِ ودار ءَ نشت آں۔
نو ھردیں کہ ماہکانیں شپ بیت من ءَ ہما شپ ءُ مئے بوتگیں دیوان انچو گیر کائنت کہ من ءَ ہمے سما بیت گوشئے دوبر آ منی دیما نشتگ ءُ ہما دابءَ گپ جنگ ءَ اِنت ءُ کندگ ءَ اِنت ءُ من گوں پُر مہرے چماں آئی چارگ ءَ آں۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔