بلوچ لبریشن آرمی ءِ جارکش جیئند بلوچ ءَ رسانکدر ءَ شنگ کتگیں یک بیانے ءَ گْوشتگ کہ 35 کلاک ءَ پد ھم آپریشن ھیروپ ءِ دومی بھرگ سرجمیں بلوچستان ءَ گوں سرجمیں زور ءَ برجاہ اِنت۔ سرمچاراں شال، نوشکی ءَ ھوار بازیں جاھاں مھکمیں کنٹرول برجاہ اَنت کہ اود ءَ دژمن ءِ پوجی ءُ انتزامیہ پشتکنز کتگ۔ بازیں جاھاں سرمچار جاڑیگ انت ءُ زورگریں لشکر ءَ پیسلہ داریں پروشی ءِ آماچی انت-
جارکش ءَ گْوشتگ: اے میان ءَ ڈپٹی کمشنر نوشکی محمدھسین ھزارہ ءُ اسسٹنٹ کمشنر ماریا شمون کہ بلوچ لبریشن آرمی ءِ نیمگ ءَ بندیگ کنگ بیتگ اَنت آ یلو کنگ بیتگ اَنت۔ اے مرسم انسان دوستی ءِ بنیاد ءَ یلہ کنگ بیتگ اَنت پرچا کہ بلوچ لبریشن آرمی ءَ گوں پولیس، لیویز یا دمگی انتزامیہ ءَ دژمنی نیست۔ بلوچ لبریشن آرمی ءَ باز رند ءَ وتی پالیسی ءِ تہ ءَ اے گپ پدر کتگ کہ اگاں پولیس یا بنجاپی فورسز سرمچارانی دیم ءَ مزاھمت مہ کنت تہ آھاں ھچ تاوان نہ رس ایت۔ اے واکدارء شرپداریں رنگے ءَ یل کنگ اے پالیسی ءِ املی منانک اِنت۔
آئی ءَ گْوشتگ: ھر جاگہ ءَ کہ پولیس نشانگ جوڑ کنگ ءُ کُشگ بیتگ ایشی ءِ سبب ایش بیتگ کہ پولیس کبزہ گیریں پاکستانی لشکر ءِ ھمراھی ءَ اوشتاتگ ءُ سرمچارانی راہ ءَ اڑاند کنگ ءِ کوشست کتگ۔ ھرکس کہ بلوچے بہ بیت، زور گیر ءِ کمکار بہ بیت ءُ سرمچارانی راہ ءَ بند بہ کنت، آ دژمن ءِ پیم ءَ کنگ بیت، ءُ آئی ءَ گوں چو دژمن ءَ ھبر کنگ بیت۔ ھمے سبب انت کہ پولیس ءَ لھتیں جاھاں مزنیں تاوان رس اتگ کہ ایشی ءِ مستریں زمہ وار آ وت انت۔ یک رندے پد ءَ پولیس، لیویز پورس ءُ دمگی سول انتزامیہ ءَ را ھاسیں رنگے ءَ ھال دیگ بیت کہ اگاں آ سرمچارانی دیم ءَ اڑانک مہ بہ اَنت گڑا آ نشانگ جوڑ نہ بنت، ءُ ڈپٹی کمشنر ءُ اسسٹنٹ کمشنر ءِ وڑ ءَ گوں شرپ ءَ یلہ کنگ بنت۔
جارکش ءَ گوشتگ کہ آپریشن ھیروپ فیز دوم ءِ وھد ءَ تاں انوگ ءَ زورگیریں پاکستانی لشکر، ایف سی ءُ پولیس ءِ 150 ءَ چہ گیش کارندہ کشتگ انت وھدیکہ دژمن ءِ فوجی ءُ انتزامیہ ءِ بنیاتی ڈھانچہ ءَ را سک باز تاوان رس اتگ۔ شال ءِ میانجی شھری دمگاں ھوار بازیں جاھاں پاکستانی لشکر سرجم ءَ ناکام بوتگ وھدے کہ سرمچار انگت ھست اَنت ءُ وتی جاہ ءَ برجاہ دارگ ءَ اَنت۔ اے کچ ءُ کساس وھد ءِ شمار اَنت وھدے کہ دژمن ءِ کلیں تاوان باز گیشتر اَنت کہ ایشی ءِ ھال ءُ اھوال چہ یکجا کنگ ءَ پد سک زوت شریں رنگے ءَ رسانکدر ءَ شنگ کنگ بنت-
آئی ءَ گیش گوشتگ کہ آپریشن ھیروپ فیز دومی انگت ءَ برجاہ انت۔ گوں بلوچ راج ءَ دزبندی انت کہ تاں انوگ ءَ سرجمی ءَ بلوچ سرمچارانی ھمراھداری کنگ بوتگ گوں ھمے جزبگ ءُ ھمکوپگی ءَ گوں بلوچ راج ءَ ھوشدار بہ بنت ءُ ھمکوپگ بہ بنت۔