پاکستانی لشکر ءَ دگہ یک بلوچ زالبولے دزگیر کتگ ءُ ناشناسیں جاھے ءَ برتگ۔
بلوچستان ءِ واپاری شھر چہ حب چوکی ءَ رس اتگیں ھالانی رد ءَ پاکستانی لشکر ءَ گوستگیں روچ ءَ یک لوگے ءِ سر ءَ چاپہ جتگ ءُ اود ءَ یک جنینے دزگیر کتگ ءُ ناشناسیں جاھے ءَ برتگ کہ چریشی ءَ پد آ بیگواہ انت۔
گوستگیں روچاں چہ ھب چوکی ءَ پاکستانی پوج ءِ دست ءَ زورانسری بیگواھی ءِ آماچ بیوکیں اے دومی بلوچ زالبول انت، ایشی ءَ پیش 22 نومبر ءَ 15 سالی ئیں نسرین بلوچ زورانسری بیگواہ کنگ بیتگ، کہ داں انگت ءَ آئی ءِ بارو ءَ ھچ اھوال نیست انت-
ھالانی رد ءَ پنچ شمبے ءِ بیگاہ ءَ انسداد ناشرکاری ءِ کارگس ءُ آھانی ھمراھی ءَ پاکستانی لشکر ءَ حب چوکی ءِ دمگ ءَ دارو ھوٹل زھری گھوٹ ءَ ارش کتگ ءُ یک جنینے دزگیر کتگ ءُ ناشناسیں جاھے ءَ برتگ۔
ھالانی رد ءَ پاکستانی لشکر ءِ دست ءَ دزگیر کنگ ءَ پد بیگواہ بوتگیں جنین ءِ پجار ھاجرہ بلوچ ءِ نام ءَ بوتگ کہ ثنا اللہ نامیں مردے ءِ جنین انت۔
لوگ ءِ مردمانی گشگ ءِ رد ءَ زالبول ءِ بندیگ کنگ ءَ پد آئی ءِ بابت ءَ ھچ وڑیں ھال ءُ اھوال دیگ نہ بوتگ کہ ایشی ءِ سبب ءَ لوگ ءِ مردم سکیں جیڑگ ءُ بے تاھیری ءِ آماچ اَنت۔
یات بہ بیت کہ 22 نومبر 2025 ءَ آواران ءِ نندوکیں نسرین بلوچ بنت دلاور ھم چہ ھمے دمگ حب چوکی ءَ پاکستانی لشکر ءَ زورانسری ءَ بیگواہ کتگ۔
نسرین بلوچ ءِ لوگ ءِ مردماں گوستگیں روچ ءَ یک پریس کانفرنسے ءِ تہ ءَ گشتگ کہ ایف سی ءُ لس پوشاکی کارمنداں آہانی لوگ ءِ سر ءَ چاپہ جتگ ءُ نسرین بلوچ گوں وت برتگ۔ 27 روچ ءِ گوزگ ءَ پد ھم نسرین بلوچ انگت ءَ دیم ءَ آرگ نہ بیتگ ۔
دومی نیمگ ءَ بلوچستان ءَ پہ زور بیگواہ کنگ ءِ کیسانی تہ ءَ گیشی بوھگ ءَ اِنت کہ اود ءَ ھمے گْوستگیں روچاں زالبول ھم مزنیں کساسے ءَ بیگواہ کنگ بیگ ءَ اَنت۔
اے ماہ ءِ اولی روچ ءَ چہ خضدار ءَ فرزانہ نامیں جنینے ءُ چہ دالبندین ءَ رحیمہ نامیں بلوچ زالبولے پاکستانی لشکر ءَ گوں وتی برات ءَ گوں دزگیر کتگ ءُ ناشناسیں جاھے ءَ برتگ انت داں انگت ءَ یل نہ بیتگ انت۔
ھمے وڑ ءَ بلوچ نودربر ماہ جبین بلوچ کہ اے سال ءِ مئی ءَ پہ زورانسری بیگواھی ءَ آماچ بیتگ اَت انگت ءَ دیم ءَ آرگ نہ بیتگ۔
سیاسی ءُ انسانی ھکانی گلاں بلوچستان ءَ زورانسری بیگواہ کنگ ءِ بے تاھیریں ویل ءُ ھاسیں رنگ ءَ زالبولانی زورانسری ءَ بیگواہ کنگ ءِ گیش بوگ ءِ سر ءَ سکیں دلپدردی درشان کتگ ءُ اے کار ءَ را یک ھترناکیں رھبندے لیک اِتگ۔
انسانی ھکانی گلاں لوٹ کتگ کہ پاکستانی واکدار بلوچستان ءَ برجاھیں زورانسری بیگواہ کنگ ءِ ھلاسی ءَ بہ کن اَنت ءُ بیگواھیں مردماں پدر بہ کن اَنت ءُ اے کار ءَ ھواریں کارندھانی ھلاپ ءَ کارروائی بہ کن اَنت۔