بلوچستان : دو کسان سالی ئیں نودربراں ھوار چار مردم بیگواہ، چاردہ بیگواھیں مردم یل کنگ بیتگ اَنت

بلوچستان ءِ جتاجتائیں دمگاں چہ دو کسان سالی ئیں نودربراں ھوار چار مردم بیگواہ کنگ بیتگ اَنت ، وھدے کہ چاردہ بیگواھیں مردم یل بیتگ ءُ وتی لوگاں سر بیتگ اَنت-

بلوچستان ءِ دمگ کلات ءِ ھند منگچر ءِ جھمنندیں چہ سندھ ءَ پاکستانی پوج ءِ دست ءَ آوار جنگ ءُ بیگواہ کنگ بیتگ اَنت-

عبدالستار ءُ عبدالسلام ءُ چہ سکھر بیگواہ کنگ بیتگ اَنت – کھول ءِ رِد ءَ دوئیں مردم سندھ ءَ دھکنکاری ءُ کشتکشاری ءَ ھمگرنچ بیتگ اَنت-

ھمے وڑ چہ کیچ ءَ دو کسان سالی ئیں نودربر آوار جنگ ءُ بیگواہ کنگ بیتگ اَنت-

اھوالکار ءِ رد ءَ پانزدہ دسمبر ءَ کیچ ءِ بُنجاھی شھر تربت ءِ ھند کولوائی بازار آبسر ءَ دو کسان سالیں نودربر آوار جتگ ءُ بیگواہ کتگ اَنت-

آوار جنگ بیتگیں ھشت تبک ءِ نودربر نیک بخت ھسین ء گلام ھسین ءُ صابر ء عبدالمجید ھوار اَنت ، نیک بخت پانزدہ دسمبر 2025 ءَ لوگ ءَ چہ بازار ءَ برجاہ یک کمپیوٹر سینٹر ءَ روگ ءَ بیتگ کہ ناشناسیں سلاہ بندیں مردماں آوار جتگ ءُ بیگواہ کتگ-

ھمے وڑ چاردہ سالی ئیں نودربر صابر مجید ء عبدالمجید کہ سیادی سامی ءَ گوشگ بوگ ءَ اِنت آ ھم کولوائی بازار ءِ جھمنند اِنت-

دومی نیمگ ءَ پاکستانی پوج ءِ دست ءَ زورانسری بیگواہ کنگ بیتگیں امجد بلوچ جھمنند گوادر، رستم خان ء عبدل ھادی قمبرانی، ھلال داد ء داد اللہ جھمنند تمپ، عرفان حسین ء ھیر خان. شھنواز ء رحمت، جاوید جمعہ ء جمعہ خان، ظھور احمد ء فتح خان، زاھد احمد ء زھری خان، عبدالمالک ء اللہ بخش، بشیر احمد ژیری خان، عارف بلوچ، ضمیر احمد ء عبدالواحد ءُ گاجیان جھمنند گریشہ ھُزدار یل کنگ بیتگ ءُ وتی لوگاں سر بیتگ اَنت-

اے سرجمیں مردم ھمے سال نومبر ءُ دسمبر ءَ جتاجتائیں دمگاں چہ زورانسری بیگواہ کنگ بیتگ اَنت-