آسر نہ بیتگیں گُلگِدار ءُ الماس
نبشتہ کار: مھروز ھمل
دی بلوچستان پوسٹ
لھتے گلگدار گپ ءُ رپ ءَ پیش ھلاس بنت ءُ لھتے جست ھنچیں بنت کہ آیانی پسو ءَ وھد ھچبر نہ دنت ۔لھتے گُلگِدار چہ جستاں ناں بلکیں ھاموشی ءَ گوں سرجم بنت ۔ لھتے ھنچیں گند ءُ نند بنت کہ باوست ءَ پیش ھاموشی ءَ گوں سرجم بنت ءُ لھتے جست پسو ءَ پیش راجدپتر ءِ بھر جوڑ بنت ، لھتے ھنچیں گلگدار بنت کہ آ ھست نہ بنت ءُ گوستانک ءِ تہ ءَ کَل بنت ءُ لھتے جستانی پسو نبشتہ نہ بنت آ دیھونیانی دروشم ءَ پدر بنت ۔
منی گوں الماس ءَ ھم ھنچیں گُلگِدارے اَت کہ بندات وَ بوتگ اَت بلے سرجم نہ بوت ۔ اے گُلّگِدار جست ءُ پسوانی درچ ءِ نہ ات بلکیں یک پگری باوستے ءَ ات کہ من چہ دی بلوچستان پوسٹ ءِ نیمگ ءَ گچینی آئی ءِ نوکتریں رجانک کتگیں کتاب ‘شہری گوریلا’ ءُ آئی ءِ دومی رجینتگیں تاک ‘وار آف دی فلی’ ءِ درگت ءَ جست کنگ لوٹ ات کہ آئی ءَ ھو کت ۔ اے تھنا اھوالکاری ءِ گوں چشیں مردمے ھال کنگ نہ ات منی جندے ھم واھشت ات کہ من ھنچیں مردمے ءَ گوں گپ جنگ ءَ آں کہ آئی ءِ نبشتگیں دانکاں زوراک ءِ چماں واب نیست ۔ اے پہ من بلاھیں شرپے ات کہ من یک ھنچیں بامردی ءَ گوں گپ جنگ ءَ آں کہ آ راستی ، گھگیری ءُ زانشت ءِ چیدگ زانگ بیت ۔ یک ھنچیں مردمے کہ اے زوراکیں زمانگ ءَ ھاموش نہ بیت ، کہ راستی ءِ درشان ءَ وتی جان ءِ بہ ببا دیگ ءَ ساجو انت ۔ منی مول بس آئی پسوانی دیم ءَ آرگ نہ ات بلکیں آئی ءِ پگری سپر ھم پھمگی ات کہ آئی ءِ رجینتگیں کتاب ‘وار آف دی فلی’ ءَ بندات بوتگ ءُ نوکتریں کتاب ‘شہری گوریلا’ ءَ سر بوتگ ات ۔
الماس تھنا نبشتہ کار ، رجانکارے نہ ات ندکارے نہ ات آئی ءَ ند ءِ ھمراھی ءَ کرتنی جھان ءَ ھم وتی گام ایر کت انت ، آئی ءِ پجار یک ندکارے ءَ گیش راجی جھد کارے ات ، آئی ءِ گور ءَ وھد ءِ کمی ات بلے پد ءَ ھم بازیں چیزے آئی ءَ وتی پشت ءَ ایر کت ءُ شت ۔ الماس ءَ ھمنچو وھد کہ رس اتگ ات اے کسانیں وھد ءِ تہ ءَ آئی ءَ پگر ءُ زانت ءُ سسا ءِ بلاھیں گرنچے وتی پشت ءَ یل دات ءُ شت ۔ آئی ءَ زانتگ ات کہ راجی جھد ءَ ایوک ءَ گوں توپک ءَ ناں بلکیً ند ھم کار گرگی انت ھمے واستا آئی ءِ ندکاری ءُ کرتن چہ یکے ءُ دومی ءَ جتا نہ ات انت ۔ آئی ءَ اے باور کنائینگ ءِ جھد کت کہ راجی جھد ایوک ردِ ء امل ءِ نام نہ اِنت بلکیں سرجمی ءَ زانشتی اَملے کہ آئی ءِ تہ ءَ زانت ءُ زانشت دیمھونی دراہ ھوار انت ۔ آئی ءَ زانتگ ات کہ بدل بؤکیں جاور ھالانی تہ ءَ جھد ءِ دروشم ھم بدل بیت ھمے واستا آئی ءَ توپک ھم گچین کتگ ات ۔ بلے آئی ءِ گور ءَ وھد کم ات بلے کسانیں وھد ءِ تہ ءَ آئی ءَ وتی پجار وتی لیکہ ایر کت ءُ شت ۔ آئی ءِ جند مروچی ساڑی نہ اِنت بلے آئی ءِ پگر زندگ اِنت ۔
الماس ءَ بس گوں ند ءَ پجارگ گوں آئی ءَ نا انساپی ءِ بیت ءُ ایوک ءَ توپک ءَ چہ زانگ گڑا آئی ءِ پگر ءَ را ناسرجم کنگ انت آ ھما لھتے مردمانی تہ ءَ ھوار انت کہ آیانی دست ءَ ند ھم بوتگ وھد ءِ آیگ ءَ توپک ءِ زمہ واری ھم ۔
الماس ءَ نبشتہ الم کتگ بلے آئی ءِ ند آسودگیں کوٹی ءِ تہ ءَ کاگداں سیاہ کنگ ءَ نہ بوتگ ۔ آئی ءَ زانتگ ات کہ آئی ءَ وتی ھیال ءُ لیکہ گوں کرتن ءَ ھمگرنچ کنگی انت ۔ ند آئی ءِ ھاتر ءَ زانت ءِ تالان کنگ ات ءُ آئی ءِ کرتن ھما زانشت ءِ زمہ واری اَت ۔ آئی ءَ بس اے نہ گوشتگ اَت کہ چی کنگ بوگ لوٹ ایت آئی ءَ اے ھم زانتگ اَت کجام جاور ھالاں چی کنگی انت ھمے سوب اَت کہ وھد ءِ آیگ ءِ ھمراھی ءَ آئی ءَ وت توپک ھم چست کت ۔
آئی ءَ کمے وھد بوتگ ات بلے چیدگے جوڑ بوت ، آئی ءَ وتی زمہ نبشتھی دروشم ءَ ھم پیلو کت ءُ وت ءَ پیش ھم داشت آئی ءِ نمیرانی ءَ اے گپ تچک بوت آئی ءَ آسودگیں جاھے ءَ نہ نشتگ ءُ نبشتگ نہ کتگ بلکیً آ ھما گچینی مردمانی تہ ءَ ھوار ات کہ وتی گوشتگینانی وت شاھد اَت ۔
ھمے وڑ من وتی جست پہ آئی ءَ دیم داتاں ، بلے پہ من بس اے جست نہ ات انت ، اے جست اھد ءِ یک تمردیں جھدکارے ءِ زانگ ات ۔ آئی ءِ لیکہ ، تجربگ ءُ آئی ءِ کرتنی جھد ءَ پھمگ ءِ جھد اَت ۔ من زانگ لوٹ ات کہ ‘وار آف دی فلی’ ءَ درشان کنگ بوتگیں نکان چوں اے نوکتریں ریاستی مشینری ءَ چیلنج کن انت ، اے ھم جست کنگ لوٹ ات کہ‘ شہری گوریلا’ ءِ چماں شھر ءِ چار ءُ گزار ، ٹیکنالوجی ءُ لس مردمانی زند ءِ کردار کجام ھد ءَ داں بدل بوتگ ۔ اے جست پہ یک ندکارے ءَ نہ اَت پہ یک اھدے ءَ اَت اَنت ، یک ھنچیں ندکارے کہ پہ باندات ءَ چیدگے جوڑ بوگ ءَ اَت ، بلے وھد ءَ موہ نہ دات آئی ءَ منی جستانی پسو دات نہ کرتاں ، کہ آئی ءِ نمیرانی ءِ ھال پہ من سر بوت کہ اے ھال بس یک مردمے ءِ نمیرانی ءِ ھال نہ ات اے یک تمردیں جھد کار ، زانوگریں ندکارے ءِ توار ءِ ایرموشی ءِ ھال اَت ۔ ھما توار کہ زوراک ءِ دیم ءَ مک ات ءُ پہ راستی ءِ درشان کنگ ءَ وتی جان ءِ کربان کنگ ءَ چک ءُ پد نہ بوت ۔
منی جست انگت ڈی ایم ءَ ایر انت ھما جست کہ آیانی پسو نبشتھی دروشم ءَ ناں بلے راجدپتر ءِ تہ ءَ مدامی مان انت ۔ بوت کنت آیانی راستیگیں پسو آئی ءِ زند اَت ، آئی ءِ جھد اَت ءُ پد ءَ آئی ءِ نمیرانی ۔ ھمے وڑ منی گُلگِدار کہ من گوں لپزاں آئی ءِ نبشتہ کنگ ءں واھگ داشتگ ات بلے راجدپتر ءِ تہ ءَ آ گوں ھوناں نبیسگ بوت ۔ ھما جست کہ آیانی پسو چہ ند ءَ دیگی ات انت نوں آئی ءِ دیمھونی ءَ وت دات ۔ اے بس یک مردمے ءِ نمیرانی نہ ات بلکیں سرجمیں درشانے ءِ تکمیل ات الماس ءَ ھرچی کہ گوشگی اَت آئی ءَ وتی کرتن ءُ جھد ءَ گشت ۔
بوت کنت باز مردماں گپ جنگ ءِ موہ نہ رس ایت لھتے مردم لپزاں گیش وتی کرتن ءَ گپ جن انت ءُ الماس ھم چہ ھمایاں یکے ات ، آئی ءَ پسو دات نہ کت بلے آئی ءَ مارا اے سرپد کرت کہ جھد ءِ راہ بامردانی گور ءَ وھد کم زمہ واری سک باز انت ۔
‘وار اف دی فلی’ ءِ تھیوری اور ‘شھری گوریلا’ ءِ پگر ءُ سسا ھردو ھرچ وڑیں پسوانی مھتاج نہ انت پرچاکہ الماس ءَ ھردو کتابانی املی رنگ وت وتی زندگی ءَ چہ نبشتگ ۔
آئی ءِ نمیرانی ءَ اے گپ پدر کت کہ آئی ءَ ھما ‘شھری گوریلا’ ءِ سر ءَ کہ نبشتہ کتگ آ بس کارستے نہ بوتگ بلکیں آ وت ھمے دیدانک ءِ زندگیں درورے ۔ من ءَ وتی سرجمیں جستانی پسو نہ رس ات انت بلے آئی ءِ پگر ، آئی ءِ کتاب ءُ آئی ءِ دیمھونی وت یک سرجمیں گُلگِدارے آں ۔ اے جستانی نہ رس اتگیں پسو ھمیشی ءَ پدر کنت کہ باز مردم جستانی پسو ءَ دات نہ کن انت بلکیں وت جست جوڑ بنت ءُ پد ءَ راجدپتر وتی وڑ ءَ آئی ءِ پسو ءَ جوڑ کنت ۔
الماس مروچی مئے میان ءَ ساڑی نہ انت بلے ‘وار آف دی فلی’ ءُ ‘شھری گوریل’ نوں بس تاکانی نام نہ اِنت بلکیں یک اھدے ءِ نشانی انت ۔ مروچی وھدیکہ ‘وار آف دی فلی’ ءُ ‘شھری گوریلا’ ءِ گپ بیت گڑا الماس ءِ نام بس یک ندرکار ، کارست ، یا دلیریں جھد کارے ءِ نام ءَ ناں بلکیں یک ھنچیں گواھی ءِ کہ گوں لپزاں ناں دیمھونی ءَ چہ نبشتہ کنگ بیت ۔ھما روچ ءَ من مار ات لھتے گلگدار ھچبر سرجم نہ بنت لھتے باوستاں راجدپتر وت سرجم کنت-
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-