سندھ ءُ بلوچستان ءَ پاکستانی پوج ءُ ریل ءِ سر ءَ بیتگیں اُرش ءِ زمہ واری بی آر جی ءُ بی ایل ایف ءَ منّ اِتگ اَنت

سندھ ءُ بلوچستان ءَ پاکستانی پوج ءُ ریل ءِ سر ءَ بیتگیں اُرشانی زمہ واری بی آر جی ءُ بی ایل ایف ءَ منّ اِتگ اَنت-

بلوچستان لبریشن فرنٹ ءِ جارکش میجر گوھرام بلوچ ءَ رسانکدر ءَ وتی شنگ کُتگیں درشان ءِ تہ ءَ گوشتگ کہ بی ایل ایپ ءِ سرمچاراں 15 دسمبر 2025 ءَ مند ءِ ھند ردیگ ءُ مھیر ءِ میان ءَ زورگریں پاکستانی پوج ءِ کاروان ءِ پھازداریں کنوکیں کارندہ آئی ای ڈی تراک ءِ نشانگ کتگ اَنت ، اے اُرش ءَ نائیک غلام فرید ءَ ھوار پوج ءِ دو کارندہ جاہ پہ جاھی مرتگ اَنت ۔

جارکش ءَ گوشتگ کہ یک دگہ کاروائی ءَ 15 دسمبر 2025 ءِ بیگاہ ءِ ساھت شش ءَ چہ آواران ءَ گیشکور ءَ رؤکیں زورگریں پاکستانی پوج ءِ کاروان ءِ سر ءَ زیک ءِ ھند ءَ واستی بازار ءَ سرمچاراں سنگر گپتگ اُرش کتگ ۔ کاروان ءِ سے گاڑی اُرش ءِ زد ءَ اتکگ اَنت ، اشانی تہ ءَ یک گاڑی یے ءَ باز تاوان رستگ ۔ اے گاڑی ءَ سواریں پنچ کارندہ مُرتگ انت ءُ دو ٹپی بیتگ اَنت ۔ دگہ دو گاڑیاں سواریں کارندہ چہ اُرش جاہ ءَ تتکگ اَنت ۔

جارکش ءَ دیمتر ءَ گوشتگ کہ 15 دسمبر 2025 ءِ شپ ءِ ساھت کساس ھشت ءَ بی ایل ایف ءِ سرمچاراں تُربَت ءِ ھند اوورسیز دگ ءَ برجاھیں نیوی پورس ءِ چیک پوسٹ ءَ برجاھیں سنگر ءِ سر ءَ دستی بمب اُرش کتگ چہ اشی آسر ءَ سنگر ءَ ساڑئیں کارندہ ٹپی بیتگ اَنت ۔

جارکش ءَ گوشتگ کہ بلوچستان لبریشن فرنٹ ءِ سرمچار 14 دسمبر ءِ بیگاہ ءَ مشکے ءِ ھند پندر ءَ یک کارے میان ءَ سپر ءَ بیتگ اَنت کہ زورگریں پاکستانی پوج ءِ نیمگ ءَ بال داتگیں سے کواڈ کاپٹر سرمچارانی چاروگی ءَ بیتگ ءُ آیانی نشانگ کنگ ءِ جھد ءَ کنگ ءَ بیتگ اَنت ۔ سرمچاراں پیسر ءَ کاروائی ءِ کنان ءَ اُرش کتگ ، چہ اشی آسر ءَ یک کواڈ کاپٹرے نشانگ کتگ ءُ کپتگ ۔ کواڈ کاپٹراں نشانگ کنگ ءَ پد سرمچار پہ سلامتی در کپتگ انت ءُ وتی اوتاکاں سر بیتگ انت ۔

ھمے بلوچ ریپبلکن گارڈز ءِ جارکش دوستین بلوچ ءَ شنگ کتگیں درشان ءِ تہ ءَ گْوشتگ کہ مئے سرمچاراں جیکب آباد ءَ سندھ ءَ رؤکیں ریل سکھر ایکسپریس شکارپور ھمایو شریپ ءِ نزیک ءَ چیرکتگیں بمب تراک ءَ نشانگ کتگ – تراک ءَ ٹریک ءُ ریل ءَ سک تاوان رس اِتگ-

درشانانی گُڈی ءَ دوئیں گلاں اُرشانی زمہ واری منّ اِتگ اَنت گوشتگ کہ مئے اے وڑیں اُرش بلوچستان ءِ وتواجھی ءَ تاں برجاہ بنت-