چہ شال ءَ شش ورنایانی بیگواھی ءِ ھلاپ ءَ کھول ءِ پریس کانفرنس

چہ شال ءَ 6 ورنائیں نودربر زورانسری بیگواہ، کھول ءَ پریس کانفرنس کتگ-

بلوچستان ءِ بنجاھی شھر شال ءِ میتگ قمبرانی ءِ نندوکیں سمروش بلوچ ءَ پنچ شمبے ءِ روچ ءَ شال پریس کلب ءَ گوں دگہ بیگواھیں مردمانی کھولاں پریس کانفرنس کنان ءَ گْوشتگ کہ مئے ششیں ورنائیں نودربر لھتیں ماہ پیسر پاکستانی لشکر ءَ آوار جتگ انت کہ آیانی بارو ءَ مارا سرپدی نیست انت ءُ کجا انت ءُ چے ھال ءِ توک ءَ انت ءُ ما لوٹ کن ایں ھمک روچ لوگانی سر ءَ بیڑ ءُ کسان سالیں ورنایاں یل بہ کنت انت-

آئی ءَ گوشتگ کہ چہ گوستگیں بازیں سالاں ریاستی زوراکی ءِ سبب ءَ مارا تنگ کنگ بوگ ءَ ایں، مئے واب ھرام کنگ بیتگ ءُ ابید ءِ ھال دیگ ءَ لوگانی سر ءَ بیڑ برگ ءُ ورنایاں بازیں ماھاں بیگواہ کنگ پد ءَ یل اش دے انت ءُ مارا اے زھنی دردناکی ءِ آماچ کتگ اش-

آئی ءَ گوشتگ کہ لھتیں ماہ پیسر منی ناکو فضل الرحمن قمبرانی ءُ مات ءِ برات ضیاءالرحمن قمبرانی دو رند ءَ زورانسری بیگواہ کنگ ءَ پد یلہ کنگ بوتگ اَنت ءُ نوں 6دسمبر ءِ شپ ءِ 9بج ءَ بگر داں یکبج ءَ دمگ ءُ لوگانی سرچ آپریشن کنگ بوتگ۔ مئے لوگاں چہ ناجائزیں چیزے دز نہ کپتگ انت-

آماچیں کھول ءَ گْوشتگ: بازیں چھاپہ ءُ پٹ ءُ پول ءِ وھد ءَ اکتوبر ءَ چہ مئے گس ءَ 6 ورنا ھیر بیار بلوچ، افضل بلوچ، بیبرگ قمبرانی، نور محمد،ھمل قمبرانی کہ کسان سالیں نودربر اَنت زور بیگواہ کنگ بیتگ اَنت۔

گُڈسر ءَ آیاں لوٹ کتگ کہ ورنائیں نودربر زوت یلہ کنگ بہ بنت ءُ ھمک روچ بیڑانی درچ بند کنگ بہ بیت دانکہ ما آرامیں زند گوازینت کت بہ کن ایں-