بلوچستان ءِ دمگ کیچ ءَ ایف سی ءِ تیرگواری ءَ ٹپی بوتگیں جنینے ءِ زوتیں دوا ءُ درمان کمک ءُ انساپ ءِ لوٹ کنگ ءَ زھرشانی کنگ بوھگ ءَ اِنت ۔ زھرشانی ءِ سبب ءَ سی پیک ءِ راہ بند اِنت ءُ سھاکی کیمپ ءِ دیم ءَ ھم زھرشانی نندانک دیگ بوگ ءَ اِنت ۔
اے وئیل 8 دسمبر ءَ بالگتر ءِ سھاکی ءِ دمگ ءَ بوتگ کہ اود ءَ دمگی مردمانی گشگ ءِ رد ءَ پاکستانی لشکر ءِ فرنٹیئر کور ءِ تیرگواری ءَ نذیر نامیں شھری ءِ زال دردانگ سک ٹپیگ بوتگ۔
ھاندان ءِ گشگ اِنت کہ جنین آدم ءِ جاور ھال سک نگیگ اَنت ءُ کراچی ءَ برگ بوتگ بلے اود ءَ نادراھجاہ ءَ ایف آئی آر ءِ نہ بوھگ ءِ سبب ءَ آئی ءَ را داخل کنگ ءَ چہ انکار کتگ۔
دمگی مردمانی گشگ انت کہ ٹپیگیں جنین آدم ءِ جاور ھال یکشل ءَ ھراب بوھگ ءَ انت وھدے کہ سرکاری ادارھانی نیمگ ءَ چہ ھچ وڑیں ھاسیں کمک نہ بوتگ۔ اے جاور ھال ءِ ھلاپ ءَ شھریاں راہ بند کتگ ءُ زھرشانی نندانک کتگ کہ ایشی ءِ سبب ءَ ٹریپک ءِ روانی مھتل انت۔
زھرشانی کنوک لوٹ کنگ ءَ اَنت کہ دردانگ ءَ را زوت شریں دوا ءُ درمان کنگ بہ بیت ءُ تیرگواری ءِ وئیل ءِ تچکیں پٹ ءُ پول ءِ تَک ءَ زمہ وارانی ھلاپ ءَ کارروائی کنگ بہ بیت-