بلوچستان ءِ جتاجتائیں دمگاں پاکستانی پوج ءُ ریل سر ءَ بیتگیں اُرشانی زمہ واری بی ایل اے ءُ بی آر جی ءَ منّ اِتگ

بلوچستان ءِ جتاجتائیں دمگاں پاکستانی پوج ءُ ریل سر ءَ بیتگیں اُرشانی زمہ واری بی ایل اے ءُ بی آر جی ءَ منّ اِتگ اَنت-

بلوچ لبریشن آرمی ءِ جارکش جیئند بلوچ ءَ شنگ کتگیں درشان ءِ تہ ءَ گْوشتگ کہ مئے سرمچاراں مروچی ھاران ءِ دمگ لجّے ءَ زورگریں پاکستانی پوج ءِ گاڑیانی کاروان سر ءَ ھما وھد ءَ سنگر گپتگ ءُ اُرش کتگ آ دمگ ءَ پیشگامی کنگ ءِ جُھد ءَ بیتگ – اُرش ءَ پوج ءِ سے گاڑی تچکی ءَ نشانگ ءِ تہ ءَ کپتگ اَنت، چریشی ءِ آسر ءَ چار کارندہ مرتگ ءُ بازین ئِے ٹپی بیتگ اَنت-

جارکش ءَ گْوشتگ کہ گوستگیں روچ ءَ کلات ءَ شیخری ءَ مورگند ءِ دمگاں بلوچ لبریشن آرمی ءِ سرمچاراں زورگریں پاکستانی پوج ءِ چوکی سر ءَ اُرش کتگ- اے اُرش ءَ کم چہ کم سے کارندہ مرتگ ءُ بازین ئِے ٹپی بیتگ-

جارکش ءَ دیمتر ءَ گوشتگ کہ اے روچ ءَ کلات ءِ دمگ شاہ مردان ءَ بلوچ سرمچاراں دگہ یک چوکی یے نشانگ کتگ، چریشی ءِ آسر ءَ یک کارندھے مرتگ وھدے کہ پوج ءَ گیش جانی تاوان چست کنگ کپتگ-

جارکش ءَ گْوشتگ کہ گوستگیں شپ ءَ نوشکی ءَ بس اڈہ ءِ نزیک ءَ برجاہ زورگریں پوج ءِ بُنجاھی بُنجل ءِ پھازوکی چوکیانی سر ءَ بلوچ لبریشن آرمی ءِ سرمچاراں اُرش کتگ- کاروائی ءَ یک کارندھے مرتگ وھدے کہ سرمچاراں ھمے جاہ ءَ زورگریں پوج ءِ نیمگ ءَ پٹ کتگیں چاریگی کیمرہ تباہ کتگ-

جارکش ءَ دیمتر ءَ گوشتگ کہ مروچی نصیر آباد ءِ دمگ ڈیرہ مراد جمالی ءَ بلوچ لبریشن آرمی ءِ سرمچاراں پولیس فورس ءِ گاڑی دستی بمب ءَ گوں نشانگ کتگ، چریشی ءِ آسر ءَ سے کارمند ٹپی بیتگ اَنت-

جارکش ءَ جیئند بلوچ ءَ گوشتگ دگہ یک کاروائی ءَ گوستگیں شپ ءَ ڈھاڈر ءَ بلوچ لبریشن آرمی ءِ سرمچاراں زورگریں پاکستانی پوج ءِ یک پوسٹے ءِ سر ءَ دستی بمب اُرشے کتگ، چریشی ءِ آسر ءَ دو کارندہ ٹپی بیتگ اَنت-

ھمے وڑ بلوچ ریپبلکن گارڈزءِ جارکش دوستین بلوچ ءَ وتی شنگ کرتگیں درشانے ءَ گوشتگ کہ بی آر جی ِ ءِ سرمچاراں مرچی نصیر آباد ءِ ھند نوتال ءَ جعفر ایکسپریس ءِ سر ءَ گوں راکٹ ءُ مزنیں سلاھاں ارش کتگ۔ اُرش ءِ آسر ءَ ریل ءَ ھوار زورگریں پاکستانی لشکر ءَ مالی ءُ جانی تاوان بوتگ۔

آئی ءَ گوشتگ کہ ریل ھما وھد ءَ نشانگ کتگ کہ گوں آئی ءَ پاکستانی پوج ءِ کارندہ سپر ءَ بیتگ اَنت۔

گُڈی ءَ دوئیناں اُرشانی زمہ واری منّ اِتگ ءُ گوشتگ دانکہ بلوچستان ءِ وتواجھی ءَ اُرش برجاہ بنت-