باگ ناڑی ءِ شھر سرجم ءَ گپتگ،سرکاری کارگس نشانگ، ایس ایچ او ءَ ھوار 6 کارندہ کشتگ انت، سلاہ دستیگ، یک سرمچارے شھیدـ یو بی اے

یونائیٹڈ بلوچ آرمی ءِ جارکش مزار بلوچ ءَ رسانکدر ءَ شنگ کتگیں بیانے ءَ گْوشتگ کہ 27 اکتوبر ءِ بیگاہ ءِ ساھت چار ءُ نیم ءَ کچھی ءِ ھند باگ ناڑی شھر ءَ مئے سرمچاراں شھر ءِ پترگی راہ بستگ ءُ شھر ءَ مانریتکگ انت۔ پولیس اسٹیشن، نادرا آفس، لیویز تھانہ، تھسیلدار آفس ءُ نیشنل بینک ءِ سر ءَ کاروائی کتگ-

آئی ءَ گْوشتگ تھانہ ءِ انگیر ءِ وھد ءَ ھستیں کارندھانی پجار ءُ بلوچ بوھگ ءِ بنیاد ءَ بیھار داتگ انت- بلے آیاں سرمچارانی سر ءَ اُرش کتگ، ایشی ءِ آسر ءَ سرمچاراں وتی پھریز ءِ رد ءَ بدلی گپتگ ءُ ترندیں جنگ ءُ چوپ بوتگ کہ ایشی ءِ تہ ءَ ایس ایچ او لطف علی ءَ ھوار سئے کارندہ کُشگ بوتگ اَنت۔ ھمے وھد ءَ سرمچاراں لیویز تھانہ ءِ سر ءَ اُرش کتگ ءُ اود ءَ ھستیں 11 بندیگ یلہ داتگ ءُ لیویز ءِ کارندھانی سرکاری سلاہ دست گپتگ ءُ تھانہ ءِ ماڑی مانداشتگ۔ ھمے وڑ سرمچاراں نیشنل بینک ءُ تحصیلدار کارگس ھم نشانگ جوڑ کتگ ءُ سوتکگ انت۔

جارکش ءَ گشتگ کہ کلاکانی کلاک شھر ءِ سر ءَ کنٹرول برجاہ دارگ ءُ وتی مول ءُ مراد ءِ سرجم کنگ ءَ پد سرمچار شھر ءَ چہ درآیگ ءِ تیاری ءَ بوتگ انت کہ ایف سی ءِ بازیں کارندہ دمگ ءَ سر بیتگ انت۔ ایشی ءِ آسر ءَ سرمچار ءُ ایف سی ءِ نیام ءَ نزیک ءَ یک کلاکے ءَ ترندیں جنگ ءُ چوپ بوتگ کہ ایشی ءِ تہ ءَ ایف سی ءِ سئے کارندہ مرتگ ءُ بازینے ٹپیگ بوتگ اَنت۔

آئی ءَ گوشت کہ جنگ ءُ چوپ ءِ وھد ءَ شھید سنگت صاحب خان بنگلزئی پنام ءِ شوکت ءَ گڈی پھریزی ءِ لیکہ ءَ وتی جان ءِ ھیالداری ءَ ابید وتی سینگ اسپر کتگ دژمن ءِ اُرشانی دیمپانی کتگ ءُ وتی رند ءِ سنگتاناں ایمنیں رنگ ءَ چہ دمگ ءَ درکپگ ءِ موہ داتگ۔ شبید صاحب خان بنگلزئی وتی جان ءِ کربان کنگ ءَ وتی سنگتاں پہ سلامتی رکینگ ءَ سوبین بوتگ کہ ایشی ءِ سوب ءَ گل ءِ دگہ سرمچار وش ءُ سلامت واتر کنگ ءَ سوبین بوتگ انت۔ گل شھید صاحب خان بنگلزئی ءِ بے مٹیں کربانی، بے دروریں بگادری ءُ جزم ءِ ھمت ءَ را یات کنت ءُ آئی ءِ کارپداں مدام یات کنت۔

جارکش ءَ گوشت کہ شھید سنگت صاحب خان بنگلزئی پنام ءِ شوکت 2024 ءَ یونائیٹڈ بلوچ آرمی ءَ ھوار بوتگ آئی ءَ وتی ھمک روچی زھنسازی، مھکمیں جزبگ ءُ جنگی ھنر ءِ سبب ءَ کمیں وھد ءِ تہ ءَ نامداریں اگدھے رس اتگ۔ شھری گوریلا ءِ بستار ءَ آئی ءَ دژمن ءِ رھادگ بوھگ ءِ سر ےَ نزیکی ءَ چہ نگاہ ایر کتگ، یک مھکمیں انفارمیشن نیٹ ورکے جوڑ کتگ ءُ زمین ءِ پھریزی ءِ تہ ءَ مزنیں کردے پیلو کتگ ۔ داں گڈی ساہ ءَ آئی ءَ پہ وتی ڈیھ ءِ رکینگ ءَ دژمن ءِ دیم ءَ گوں دلیری ءَ دیم پہ دیم بوتگ ءُ ابدمانیں کربانی داتگ کہ آئی ءَ را شھید ءِ مزنیں مول ءُ مراد ءِ نیمگ ءَ بُرتگ۔

آئی ءَ گْوشتگ ما پولیس ءُ لیویز ءِ کارندھاں تُرندیں بیھار دے ایں کہ وتی رویش ءَ راست بہ کن اَنت ءُ بلوچ دژمنیں کاراں چہ دست کش بہ بنت اگاں ناں آ دیم پہ دیم نشانگ جوڑ کنگ بنت۔

جارکش ءَ گْوشتگ مئے اے رنگیں اُرش داں آجوئیں بلوچستان ءِ گرگ ءَ برجاہ مان اَنت۔