بلوچستان ءَ سرکاری پلامرزی ءَ ھستیں ٹولی ءِ کوشکاریانی ھلاپ ءَ شھریانی روانک ءِ شنگ ءُ شانگ کنگ ءِ ھاتر ءَ تیرگواری کنگ بیتگ-
بلوچستان ءِ دمگ کیچ ءِ ھند دمگ نزرآباد ءَ مرچی بیگاہ ءَ بلوچ یکجھتی کمیٹی ءِ نیمگ ءَ برجم داشتگیں مچی ءِ سر ءَ ناشناسیں مردماں تیرگواری کتگ بلے اے وئیل ءَ ھچ وڑیں تاوان ءِ ھال نہ بوتگ۔
اے گپ ءِ پدر کنگ ءَ تنظیم ءَ گشتگ کہ بی وائی سی تمپ ءَ نزر آباد ءَ سلاہ بندیں مردمانی دست ءَ اکمل صالح، عبداللہ محمدجان ءُ دیدگ داد رحمان ءِ کوش ءِ ھلاپ ءَ زھرشانی ءِ جار جتگ۔
زالبول ءُ زھگاں ھوار مزنیں کساسے ءَ شھر ءِ مردماں اے روانک ءَ بھر زرتگ۔ شریکیں مردماں ریاستی پلامرزی ءَ ھستیں گل ءِ نیمگ ءَ کوشکاریانی ھلاپ ءَ شھریاں روانک کش اتگ ءُ آیانی ھلاپ ءَ اوگام جتگ-
روانک ءَ بھر زوروکیں مردمانی گشگ ءِ رد ءَ روانک ءِ بندات بوھگ ءَ گوں دو موٹر سائیکل ءِ سر ءَ سواریں چار سلاہ بندیں مردم نزیک بوتگ ءُ روانک ءِ سر ءَ بے رھبندیں تیرگواری بندات کتگ کہ ایشی ءِ سبب ءَ روانک ءِ بھر زوروک ترس ءُ بیم ءِ آماچ بوتگ اَنت ءُ شنگ ءُ تالان بوتگ اَنت۔
تمپ ءِ یک سرکاری کارندہے ءَ بلوچ یکجھتی کمیٹی ءِ روانک ءِ ھلاس کنگ ءِ ھال راست کتگ ءُ گشتگ کہ اے روانک ءَ زالبول ءُ زھگ ھم ھوار بوتگ انت، وھدے کہ سلاہ بندیں مردم رند ءَ روانک ءَ درکپگ ءَ سوبین بوتگ انت۔
زانگ بہ بیت بلوچستان ءِ جتائیں دمگاں ریاستی ادارہ ءُ ایف سی ءِ چیردستی ءَ بازیں پرائیویٹ ملیشیا پرکار انت کہ آہاں دمگی رنگ ءَ ڈیتھ اسکواڈ گش انت۔ اے گل دمگ ءَ سیاسی کارکناں نشانگ جوڑ کنگ ءُ زورانسرء بیگواہ کنگ ءِ بھتام ھست اَنت۔
بلوچستان ءَ سیاسی ءُ راجدوستیں مردم ءُ آھانی سیاد ءُ وارسانی سر ءَ اُرشانی تہ ءَ ڈیتھ اسکواڈ ھوار بوگ ءِ نام ھست انت ءُ چاگردی سلکاری دگہ دگہ ویلاں دزمانجن انت-