بلوچستان ءِ آجوئی لوٹوکیں راجکاریں گل بلوچ نیشنل مومنٹ ءِ سروک ڈاکٹر نسیم بلوچ ءَ ھمساھگیں ڈیھ اوگانستان ءِ سر ءَ پاکستان اُرش ترندی ءَ گوں ایر جتگ ءُ گوشتگ کہ پاکستان ءِ اے گامگیج ایوک ءَ میان اُستمانی کانودانی بگیرداری نہ انت بلکیں آجوئیں اوگانستان ءُ شرپمندیں اوگانیانی گیرت ءِ گونجنگ انت ۔ اے جاوراں بی این ایم اوگان راج ءِ ھمکوپگ انت ۔
آئی ءَ گوشتگ کہ پاکستان ءَ ردیں پگرے کتگ کہ اوگانستان ءِ تہ ءَ تالبانانی ھاکمی ءِ آیگ ءَ پد ڈیورنڈلائن ءِ جیڑہ وت ھلاس بیت ءُ کابل ءِ دری پالیسی سرجمی ءَ اسلام آباد ءِ مپاداں گوں بندوک بنت بلے اوگان سرکار ءَ وتی راجی واکدار ءِ تہ ءَ پاکستان ءِ ھوار کنگ نہ من اتگ ، ھمے ھما بنکی سوب انت کہ پاکستان ءَ آجوئیں ، وتواک ءُ ھمساھگیں دیھے ءِ سر ءَ اُرش کتگ بلے شرپمندیں اوگان راج ءَ پاکستان گوستانکی پسوے داتگ ءُ پدکنزینتگ ۔
آئی ءَ گوشتگ کہ بلوچ نیشنل مومنٹ ھمے پھم ایت کہ اے اُرش راستی ءَ پاکستان ءِ ھما وھدی پالیسیانی درچ انت کہ مدامی اوگانستان ءِ تھی جیڑوانی تہ ءَ دزمانجنی ، پوجی زور ، وتسریں جیڑیانی سوب ءَ وت ءَ ساڑی کنگ تانکہ اوگانستان مدامی اھسان مندی ءِ آماچ بہ بیت ۔ ھمے مولانی ھاتر ءَ پاکستانی ریاست ءَ اوگان ڈیھ چل سالی ھانہ جنگی ءِ تہ ءَ دور دیگ ءَ بنکی کرد پیلو کتگ ءُ دری ارش کارانی دست ء راست بوتگ ۔
آئی ءَ گوشتگ کہ ما بلوچ راج ءُ گل اوگان راج ءِ گوم ءَ ھمکوپگ ءُ یکجاھی ءِ جار ءَ جن ایں ۔ اے راستی ءِ کہ بلوچستان ءُ اوگانستان ءِ راج ، گوستانک ، جغرافیہ ، دودمان ءُ یکیں دژمن ءِ بگیری ءَ یکجاھیں جھدے سیادی ھست ۔ ھچ وڑیں دری تاکت ءَ اے ھک نیست کہ اے سیادی ءَ نزور بہ کنت یا براتیں راجانی میان ءَ دژمنی ءُ گلت پھمی پیداک بہ کنت ۔
بی این ایم ءِ سروک ءَ گوشتگ کہ بلوچ نیشنل مومنٹ اے ارش ءَ اے دمگ ءِ تہ ءَ یک نوکیں زوراکی ءِ شوربندی ءِ بندات ءِ سرپد بیت ، پاکستان ءِ پشتوناں چہ دزبندی کنت کہ آ پاکستان ءِ اے مھم سنگینی ءَ بہ زور انت پرچاکہ پاکستان ءِ اےگامگیج بنکی ءَ پشتونانی چکچینی ، پشتون ڈیھے نزور کنگ ءُ پنجاپی پوج ءِ ھاکمی ءِ جیڑہ ھوار انت ۔اگاں پشتون پارلیمانی پاٹیانی وتگڑیں راجی سلامتی ءِ نام ءَ پاکستان ءِ ھمنوا بہ بنت گڑا اشی ءِ سان سرجمیں دمگ ءِ سر ءَ کپ انت۔