بلوچ یکجھتی کمیٹی ءِ سروک ڈاکٹر ماھرنگ بلوچ ءِ گھار نادیہ بلوچ ءَ اسلام آباد نندانک ءُ آئی ءِ ھلاس کنگ ءِ درگت ءَ وتی ھیال درشان کتگ ءُ گوشتگ کہ ماں اسلام آباد ءَ ھپتاد ءُ چار روچاں برجاھیں نندانک ما زیک ھلاس کتگ ۔ وھدیکہ ما زھرشانی ھاتر ءَ رؤگ ءَ بوتگ انت گڑا مئے دل ءَ بازیں ھیالے اتکگ ۔ مارا ھچ وڑ ءَ اے امیت نہ بوتگ کہ پاکستانی ریاست مئے گپ ءَ گوشدار ایت پرچاکہ مارا چہ پیسر ھم بلوچاں باز رند ءَ اے جھد کتگ بوتگ ، بلے اسلام آباد ءَ مدامی اے پدر کتگ کہ اے ملک ءِ تہ ءَ بلوچ بس گلام زانگ بنت ءُ آ مارا ھچ وڑ ءَ انساپ نہ دے انت ۔
آئی ءَ گوشتگ کہ ایشی ءَ ابید ھم ما رؤگ ءِ پیسلہ کتگ مئے رؤگ ءِ مول اسلام آباد ءَ اے باور کنائینگ کہ ماھرنگ ایوک ءَ نہ ایں کہ آئی ءَ بندیگ کنگ ءَ چہ بلوچ راج ءَ جھد ءِ ھک پچگرگ بیت یا بلوچ راج چیر ترینگ بیت ۔ ماھرنگ ءُ بی وائی سی ءِ ایندگہ سنگتانی نزر بند کنگ ءِ بنکی مول ءُ مراد ھمے ترس پیداک کنگ کہ ھچ کس توار چست مہ کنت ءُ بلوچ چہ وتی ھکانی جھد ءَ دزکش بہ بنت بلے اسلام آباد ءَ اے دراھیں اڑاندانی دیمپان بوگ ءَ ابید ما ھپتاد ءُ چار روچاں نندانک داتگ ءُ اے پدر کتگ کہ ما ھچ وڑیں جاوراں ھاموش نہ بہ ایں ۔ مئے جھد ھاموش نہ بیت تاں ھما وھد ءَ کہ ریاستی زوراکی برجاہ بیت بلوچ جھد ءُ اے ماتانی پرایمنیں جھد ءَ ھچ کس داشت نہ کنت، تاں ھما وھد ءَ اسلام آباد ءِ زوراکی برجاہ بنت بلوچ راجی جھد برجاہ مان ایت ۔
نادیہ بلوچ ءَ گوشتگ کہ اسلام آباد ھچبر اے مارشت دیگ ءَ یل نہ دنت کہ مارا چی سمج ایت ۔ اے میان ءَ آئی ءَ مدامی ترسینتگ مارا پولیس ءُ ایجنسیانی دست ءَ چیر ترینگ ءِ جھد کتگ بلے اے مات ءُ گھارانی تمردی ءَ سلام انت کہ ریاستی زوراکیانی دیمپانی ءِ کتگ پد نہ کنز اتگ انت ۔
آئی ءَ گوشتگ کہ من یک وکیلے ءَ من شری ءَ زاناں کہ پاکستان ءَ کانود ءُ رھبندانی ارزشت چی انت ءُ اد ءَ کانود ءُ رھبندانانی گون ءَ چی وڑ ءَ مسکرا کنگ بیت بلے اشی ءَ ابید ما جیڑہ چار اتگ ءُ وتی زھرشانی اسلام آباد ءَ نبشتہ کنائینتگ تانکہ جھان ءَ پدر بہ بیت کہ بلوچستان ءِ تہ ءَ پاکستانی ریاست چی کنگ ءَ انت ۔ ما اد ءَ جھان ءِ دیم ءَ اسلام آباد ءِ زوراکیانی پدر کنگ ءَ یکجاہ بوتگ انت ءُ ما ایشی ءَ سوبمند بوتگ انت ۔
نادیہ بلوچ ءَ گوشتگ کہ وھدیکہ ما اسلام آباد ءَ رس اتگ انت گڑا مئے وش آتکی پولیس ءِ ترس ءُ بیھار ءَ زھرشانی ءِ ھک ءَ زبھر کنگ ءَ بوتگ ۔ مئے سر ءَ دو رند ءَ لٹ شاپی کنگ بوتگ مارا زاہ ءُ بد کنگ بوتگ ءُ بار بار مارا گلام بوگ ءِ مارشت دیگ بوتگ ۔ مارا پریس کلب ءِ دیم ءَ زھرشانی کنگ ءَ ھم نہ اشتگے وھدیکہ ما ھمود ءَ وت ءَ دارگ ءِ شور جتگ گڑا مئے سر ءَ چد ءُ گیشتر زوراکی کنگ بوتگ ۔
آئی ءَ گوشتگ کہ ھمودا ما کرایہ گس زرتگ گڑا ھما شپ ءَ ما چہ اود ءَ در کنگ بوتگ انت ءُ مردم بیھار دیگ بوتگ انت کہ ایشاں گس مہ دے ایت ایشی ءَ ابید وکیل ایمان مزاری ءُ الی ھادی کہ اے گرانیں ساھتاں مئے گون ءَ اوشتوک بوتگ انت آ ریاست ءِ نیمگ ءَ یکشل ءَ بیھار دیگ بوتگ انت ۔
نادیہ بلوچ ءَ گوشتگ کہ اے پیسلہ ءَ ما راجدپتر ءِ سر ءَ یل دے ایں کہ آ مارا کجا بارت بلے ما وتی زرمبشت ءُ جھد ءَ ھر وڑ ءَ برجاہ دار ایں ۔ منی گھار ءَ من ءَ ھمے درونت داتگ کہ انساپ ءِ شوھاز ءَ ھکانی گرگ ءِ جھد یک گرانیں ءُ دراجیں سپر ئے ۔ ما چہ اسلام آباد الم واتر بوتگ ایں بلے مئے جھد اد ءَ ھلاس نہ بیت اے برجاہ مان ایت ۔