زھری ءُ کلات ءَ پوجی آپریشن، ھیلی کاپٹرانی بال

بلوچستان ءِ دمگ زهری ءُ قلات ءَ پاکستانی لشکر ءِ آپریشن، پورسز ءِ گاڑیانی ھواری ءَ پیشگامی، بالی کمک ھوار انت-

ھزدار ءِ دمگ زھری ءَ پاکستانی لشکر دیم ءَ جنزگ ءَ انت۔ چہ ھزدار شھر ءَ زهری ءِ نیمگ ءَ روگ ءَ لشکر ءُ دگہ لشکری کاروان گندگ بوتگ اَنت۔

دمگ ءَ ھیلی کاپٹرانی بال برجاہ اَنت ءُ گزان ءُ انجیرا ءِ دمگاں فورسز ءُ ‘ڈیتھ اسکواڈ’ دیم ءَ روگ ءَ گندگ بوتگ اَنت۔

دومی نیمگ ءَ کلات ءِ دمگ زاوہ ءَ پاکستانی لشکر ءُ سلاہ بندیں مردمانی نیام ءَ جنگ ءُ چوپ ءِ ھال بیتگ۔ دمگی مردمانی رد ءَ مرچی سھب ءَ لشکر ءَ دمگ ءَ دیم ءَ روگ ءِ کوشست کتگ کہ دمگ ءَ سنگر گپتگیں سلاہ بندیں مردماں اُرش کتگ۔

واکداراں اے درگت ءَ انگت ءَ ھچ وڑیں ھال ءُ اھوال نہ داتگ۔

زانگ بہ بیت چہ اگست ءَ زھری ءِ شھر ءُ آئی ءِ کش ءُ گور ءِ دمگ بلوچ آجوئی لوٹوکیں مردمانی دستیگی ءَ انت کہ اود ءَ سلاہ بندیں آجوئی لوٹوکیں مردم شھر ءِ تہ ءَ گشت ءَ گندگ بوتگ اَنت ایشانی تہ ءَ جتا جتائیں جاھاں ھوار ناکہ بندی ھم ھوار اَنت۔

گوستگیں روچاں زھری ءِ دو جاگہ ​​پاکستانی لشکر ءَ گوں جیٹ ءُ ڈرون ءَ بمبگواری کتگ ءُ دمگی مردم نشانگ جوڑ کنگ بوتگ انت۔ اے بمبتراک ءَ بیران بوتگیں مردمانی تہ ءَ جنین ءُ چُک ھم ھوار اَنت۔

گوستگیں شپ ءَ سوراب ءُ قلات ءَ مزن شھدگ ءِ سر ءَ بازیں کلاکاں سلاہ بندیں مردماں بندش جتگ کہ اے وھد ءَ کسٹم ءِ گاڑی ءُ کارندھانی دزگیری ءِ ھال رس اِتگ۔