بلوچستان ءِ دمگ ھزدار ءِ ھند زھری ءَ تراسانی کاز وے ءِ نزیک ءَ پاکستانی لشکر ءِ نیمگ ءَ ڈرون اُرش ءَ یکیں ھاندان ءِ دو جنین ءُ یک مردینے ءَ ھوار چار مردم بیران ءُ پنچ ٹپیگ بوتگ اَنت۔
دمگی مردمانی رد ءَ ڈرون ءِ اُرش مچی ءِ نزیک ءَ کنگ بوتگ کہ ایشی ءِ تہ ءَ علی اکبر میراجی ، آئی ءِ لوگ بانک ءُ دگہ دو سیاد بیران بوتگ اَنت ۔ یک راہ گوزے ھم بیران بوتگیں مردمانی تہ ءَ ھوار اِنت ءُ جنین ءُ مردین ھم ٹپیانی تہ ءَ ھوار اَنت۔
بنشون ءِ رد ءَ بیران بوتگیں مولوی علی اکبر میراجی وتی ھاندان ءِ ھمراھی ءَ سوراب گدر ءَ پہ دلپدردی ءِ درشان کنگ ءَ شتگ بیتگ ءُ وتی ملک ءَ واتر بوھگ ءَ بیتگ کہ آئی ءِ کاروان ڈرون ءِ اُرش ءَ نشانگ جوڑ کنگ بوتگ۔
دمگی مردمانی گشگ انت کہ اے دمگ ءَ ڈرونانی بال برجاہ انت کہ ایشی ءَ چہ ترس ءُ بیمی جاور ودی بیتگ انت-
پاکستانی لشکر ءَ مرچیگیں ڈرون اُرش ءِ بابت ءَ سرکاری بیان شنگ نہ کتگ بلے دو روچ پیسر آئی ایس پی آر ءَ زھری ءَ جیٹ بمبتراک ءِ ھال راست کتگ۔
یک فوجی جارکش ءِ رد ءَ اے بمبتراک ءَ بلوچ آجوئی لوٹوکیں مردمانی پناہ گاھے نشانگ جوڑ کنگ بوتگ بلے دمگی مردمانی گْوشگ اِنت کہ اے بمبتراک ءَ لس مھلوک ءَ را تاوان رس اتگ کہ ایشی ءِ تہ ءَ پندرانی ٹک ءِ سئے مردم بیران بوتگ اَنت۔
گوستگیں ھپتگاں زھری ءُ آئی ءِ کش ءُ گوراں پاکستانی لشکر ءِ نیمگ ءَ چہ بالی اُرش ءِ اے دومی وئیل اِنت۔ اگست ءَ چہ اے دمگ ءَ سئے ءَ چہ گیش بالی اُرش کنگ بوتگ کہ ایشی ءِ تہ ءَ دو ڈرون اُرش ھم ھوار اَنت۔
زانگ بہ بیت چہ 11 اگست ءَ زھری ءِ جتاجتائیں دمگ بلوچ آجوئی لوٹوکیں مردمانی دستیگی ءَ بوتگ اَنت کہ اے وھد ءَ پاکستانی لشکر بازیں اُرشانی دیمپان بوتگ ءُ ایشی ءِ تہ ءَ بازیں کارندہ بیران بوتگ اَنت۔
زھری ءِ کنٹرول ءُ پاکستانی لشکر ءِ سر ءَ اُرشانی زمہ واری بلوچ آجوئی لوٹوکیں یکجاھیں گل براس ءَ من اتگ انت-