گوستگیں شپ ءَ اوگانستان ءِ رودراتکی دمگاں بازیں ڈرون اُرش ءِ ھال رس اِتگ کہ ایشی ءِ تہ ءَ خوست ءُ ننگرھار ءِ جتا جتائیں دمگ اُرش کنگ بوتگ اَنت۔
دمگی مردم ءُ چمدیستگیں مردمانی رد ءَ اے اُرشانی تہ ءَ زالبول ءُ زھگاں ھوار لس شھری ھوار انت۔
دمگی مردمانی گشگ انت کہ خوست ءِ دمگ اسپیرا ءِ ھند سرخاخ ءَ یک جھمنندی لوگے ءِ سر ءَ ڈرون اُرش کنگ بوتگ کہ ایشی ءِ آسر ءَ سئے زھگ بیران بوتگ انت۔
ھمے رنگ ءَ ننگرھار ءِ دمگ غنی خیل ءِ بیست ءُ نُھمی نھر ءِ دمگ ءُ شینوری ءَ ھم ڈرون ءِ اُرش کنگ بوتگ بلے اود ءَ بیران ءُ تاوان ءِ راستیں کساس انگت ءَ پدر نہ بوتگ۔
اوگان اھوالکارانی رد ءَ اے دمگاں بازیں ماھاں ڈرونانی بالی گندگ بوھگ ءَ بیتگ انت۔ دمگی مردمانی گْوشگ اِنت کہ گوستگیں شپ ءَ تراکانی توار یکے پد دومی ءَ اِشکنگ بیتگ اَنت کہ تراک ءِ توار ڈرون ءِ اُرش ءِ رنگ ءَ گْوشگ بیگ ءَ اَنت۔
بلے اے درگت ءَ اوگان سرکار ءِ نیمگ ءَ تاں انوگ ءَ ھچ وڑیں ھال ءُ اھوال پدر نہ بوتگ انت۔
دومی نیمگ ءَ پاکستانی اھوالکار ءُ سوشل میڈیا اکاؤنٹاں کہ فوجی ادارگانی پلامرزاں ٹاہ داتگ کہ ننگرھار ءَ ڈرون اُرش تحریک طالبان پاکستان ءِ پناہ گاھانی سر ءَ بوتگ اَنت بلے پاکستان ءَ سرکاری تک ءَ ھچ وڑیں سرکاری لیکہ نیتکگ انت۔
زانگ بہ بیت کہ پاکستان ءِ سرکار ءُ لشکر ءِ نیمگ ءَ اوگان طالبان سرکار ءِ سر ءَ پاکستان ءِ تہ ءَ سیمسر ءِ سر ءَ اُرش کنگ ءُ تحریک طالبان پاکستان ءَ ھوار بلوچ آجوئی لوٹوکاں پناہ دیگ ءِ بھتاماں جنگ ءَ انت بلے اوگان سرکار ءَ سفارتی ءُ سرکاری تک ءَ اے بھتام رد کتگ اَنت۔
یات بہ بیت کہ پاکستان ءَ پیسر ءَ ھم اوگانستان ءِ تہ ءَ بازیں بالی ءُ ڈرون اُرش کتگ کہ ایشی ءِ تہ ءَ تحریک طالبان پاکستان ءِ باسک گمانی ءَ نشانگ جوڑ کنگ بوتگ اَنت بلے اے اُرشانی تہ ءَ باز براں لس مردمانی بیرانی ءِ ھال دیم ءَ اتکگ انت۔
چہ ایشی ءَ پیسر 16 اپریل 2022 ءَ اوگان طالبان ءِ واک ءَ آیگ ءَ چہ بس پنچ ماہ ءَ پد پاکستانی لشکر ءَ خوست ءُ کنڑ ءِ اُستاناں پریڈان، جیٹ ءُ ڈرون ءِ کمک ءَ جاہ نشانگ جوڑ کتگ انت-
اوگانستان ءِ واکدارانی رد ءَ اے اُرشانی تہ ءَ کم چہ کم 47 مردم بیران ءُ 23 ٹپیگ بوتگ اَنت کہ گیشتریں مردم لس مردم اَنت۔
ھمے رنگ ءَ 25 دسمبر 2024 ءَ پاکستانی بالی اُرد ءَ پکتیکا ءِ دمت برمل ءِ بازیں میتگانی تہ ءَ لوگ نشانگ جوڑ کتگ اَنت۔ طالبان ءِ واکدارانی رد ءَ اے اُرشانی تہ ءَ 46 مردم بیران بوتگ کہ آھانی تہ ءَ گیشتریں مردم جنین ءُ زھگ بوتگ اَنت۔ پاکستان ءَ ٹاہ داتگ کہ اے آپریشن ءَ ٹی ٹی پی ءِ 45 باسک بیران بوتگ انت۔
دیمترا 18 مارچ 2024 ءِ شپ ءَ پاکستانی لشکر ءَ اوگانستان ءِ دمگاں بالی اُرش کتگ ءُ کم چہ کم 8 شھری بیران بوتگ اَنت۔