پوج ءِ دست ءَ چُک ءِ کوش: انساپ لوٹ کنوکیں مات ءِ زورانسری بیگواہ کنگ ءِ بیھار

مستونگ ءَ پاکستانی پوج ایف سی ءِ دست ءَ ورنا احسان شاہ ءِ کوش ءِ ھلاپ ءَ آئی ءِ مات ءِ نندانک مروچی ھم برجاہ-

گیشیں ھالانی رِد ءَ بلوچستان ءِ دمگ چہ مستونگ ءَ سیادی داروکیں احسان شاہ سے جون 2025 ءَ شال ءِ دمگ غنجہ ڈوری ءَ پوج ءِ کارندھاں تیرگواری ءِ نشانگ کتگ-

احسان ء مات گوستگیں دو ھپتگ ءَ چہ شال پریس کلب ءِ دیم ءَ نندانک دیگ ءَ اِنت اود ءَ آ وئیل ءَ ھمگرنچیں کارندھانی دزگیر کنگ ءِ لوٹ ءَ کنگ ءَ اِنت-

احسان ء مات ءَ یک تامُربندیں درشانے ءِ تہ ءَ گوشتگ کہ نندانک ھلاس کنگ ءِ ھاتر ءَ ڈپٹی سپرنٹنڈنٹ پولیس ءِ نیمگ ءَ چہ آ بیھار دیگ بیتگ، آئی ءِ رِد آئی ءِ دزگیر کنگ یا زورانسری بیگواہ کنگ بیھار دیگ بوتگ-

اھسان ءِ مات اے بھتام ھم جتگ کہ ایف آئی آر نبشتہ کنگ ءِ میان ءَ مستونگ پولیس ءِ نیمگ ءَ چہ آ آئی ءِ کھول تُرسینگ بیتگ-

زانگ بہ بیت کہ آمیدگس ءِ پرمان ءِ احسان شاہ ءِ کوش ایف آئی آر ایف سی ءِ کارندھانی ھلاپ ءَ نکش کنگ بیتگ، بلے سانمندیں کھول ءِ گوشگ اِنت کہ ھمے کارندھاں واکدار نیمگ ءَ چہ دزگیر کنگ جاہ ءَ پھاز دیگ بیگ ءَ اِنت-

احسان شاہ ءِ مات ءَ بلوچستان ءَ سیاسی پارٹی ءُانسانی ھکانی گلاں چہ دزبندی کتگ کہ آ آیانی گوم ءَ ھمدردی بہ کن اَنت انساپ ء لوٹ ءَ آیانی ھمراھداری بہ کن اَنت-

گُڈی ءَ آیاں گوشتگ کہ آ واکدار ءِ بیھاراں چہ تُرس آماچ نہ ایں ءُ دانکہ انساپ نہ رس اِیت زھرشانی نندانک شال پریس کلب ءِ دیم ءَ برجاہ بیت-