بلوچستان ءِ دمگ کیچ ءَ ناشناسیں سلاہ بندیں مردماں یک ورنایے آوار جتگ، اے وئیل زوندان بُنجل ءِ نزیک ءَ بیتگ-
اِھوالکار ءِ رِد ءَ، ندیم ء سلیم جھمنند گلی بلیدہ موٹر سائیکل ءُ یک گاڑی ءَ سوار سلاہ بندیں مردماں داشتگ، زورانسری گاڑی ءَ نندارینتگ ءُ ناشناسیں نیمگے ءَ شتگ اَنت-
دمگی اِھوالکار ءِ رِد ءَ آوار جنوک سادھیں پوشکانی تہ ءَ بیتگ اَنت بلے آیانی گور ءَ نوکیں سلاہ بیتگ انت ءُ آیانی وڑ ءُ پیم ءَ چہ زانگ بیت کہ آیانی سیادی چہ سرکاری پلامرزی سلاہ بندیں ٹولی ” ڈیتھ اسکواڈ ” ءَ اِنت چہ-
بلوچستان ءَ “ڈیتھ اسکواڈ ” اے وڑیں بے دودیں سلاہ بندیں ٹولیاں گوش اَنت کہ ریاستی ادارھانی پلامرزی ءَ چہ پُرکار بنت- آیانی مول ءُ مراد ھلاپیں سیاسی کارکنان، انسانی ھکانی باسکانی نشانگ کنگ اِنت- اے ٹولی گیشتر سادھیں پوشکانی تہ ءَ کار کن اَنت-