بلوچستان ءِ ھَند پنجگور ءِ دمگ کوھنیں پروم کراس ءَ چہ یک مردے ءِ تیر آماچیں لاش دزکپتگ۔ آئی ءِ پجار گوارگو ءِ نندوکیں بدل ءِ چُک عمر ءِ نام ءَ بوتگ۔
لیویز ءِ گشگ انت کہ دزکپتگیں مردم ءِ لاش ءِ سر ءَ بازیں تیرانی ٹپ گندگ بوتگ انت کہ اے گپ ءِ پدر کنگ ءَ انت کہ آ تیرگواری ءَ چہ بیران بوتگ۔ لاش ءِ ھاتر ءَ المی ئیں کارروائی ءِ ھاتر ءَ دمگی نادراھجاہ ءَ سر کنگ بوتگ۔
لیویز ءِ کارندھاں گیش گْوشتگ کہ عمر ءِ کھول ءِ رد ءَ 31 جولائی 2025 ءَ چہ گوارگو ءَ ناشناسیں سلاہ بندیں مردماں آوار جتگ ءُ اے وئیل ءِ گیشیں پٹ ءُ پول برجاہ اِنت۔
بلوچستان ءِ اے دمگ ءَ گوستگیں ماھاں زوراکی ءَ بیگواہ کنگ ءُ نشانگ جوڑ کنگ ءِ تہ ءَ گیشی بوتگ۔ گوستگیں سئے روچانی تہ ءَ ایوک ءَ پنجگور ءَ بیگواھیں سئے مردمانی جون دز کپتگ اَنت۔
مراد ءِ زھگ ورنائیں شاہ جان ءِ ٹپ ءُ ٹوریں لاش 4 اگست ءَ پنجگور ءَ دزکپتگ ءُ شاہ جان ءِ آروس ءَ چہ بس دہ روچ ءَ پد اے سال ءِ 29 جولائی ءَ ریاستی ڈیتھ اسکواڈ ءِ کارندھاں زوراکی ءَ بیگواہ کتگ۔
ھاندان ءِ مردم ءُ دمگی مردمانی گشگ ءِ رد ءَ آئی ءَ را ایف سی کیمپ پنجگور ءَ برگ بوتگ کہ چہ اود ءَ آئی ءِ بابت ءَ ھچ وڑیں ھال ءُ اھوال دیگ نہ بوتگ۔ پد ءَ آئی ءِ لاش ٹپ ءُ ٹوریں جاوراں دست کپتگ۔
ایشی ءَ ابید 3 اگست ءَ پنجگور ءِ دمگ پروم ءَ چہ یک کوھنیں ٹپ ءُ ٹوریں لاشے دزکپتگ کہ آئی ءِ پجار ھیر مھمد ءِ چُک عنایت اللہ اِنت۔ عنایت اللہ گوستگیں سال ءِ دسمبر ءِ بندات ءَ موتر سواراں آئی ءِ لوگ ءِ مردمانی گشگ ءِ رد ءَ ”ڈیتھ اسکواڈ“ ءِ کارندھاں چہ آئی ءِ لوگ ءَ آوار جتگ۔