سیکورٹی پورسز ءِ دزگیر کنگ ءَ پد زورانسری بیگواہ کنگ بوتگیں سَے مردم دیم ءَ اتکگ اَنت کہ چہ آیاں دو مردم یل کنگ بوتگ اَنت۔
ھالانی رد ءَ کراچی یونیورسٹی ءِ فلسفہ ءِ شعبہ ءِ نودربر مسلم داد بلوچ کہ 27 جولائی ءَ کراچی یونیورسٹی ءِ چہ مسکان گیٹ ءَ زورانسری ءَ بیگواہ کنگ بوتگ آ مرچی یل کنگ بوتگ۔
کھول ءَ مسلم داد ءِ سلامتیں واتر بوھگ ءِ ھال راست کتگ۔
دومی نیمگ ءَ تربت ماھیگ ءِ بازار ءَ چہ بیگواہ بوتگیں موسیٰ ء میر گل مری ھم گوستگیں روچ ءَ یل کنگ بوتگ ءُ لوگ ءَ سر بوتگ۔
دومی نیمگ ءَ گوستگیں ماہ ءِ 23 ءُ 24 جولائی ءِ میانجی ئیں شپ ءَ شال بروری روڈ ءَ جھمنندیں کوٹی ءِ سر ءَ سی ٹی ڈی ءِ ارش ءِ وھد ءَ بیگواہ بوتگیں کانود ءِ نودربر ءُ وکیل حکیم بلوچ ھم دیم ءَ آرگ بوتگ۔
اھوالانی رد ءَ انسداد ناشرکاری ءِ مھکمہ ءِ نیمگ ءَ جاری بوتگیں نوٹیفکیشن ءِ تہ ءَ حکیم بلوچ ءِ سر ءَ انسداد ناشرکاری ایکٹ ءِ سیکشن 11-EEEE ءِ رد ءَ ارزی نبشتگ کنگ بوتگ ءُ پٹ ءُ پول ءِ ھاتر ءَ یک ماھے ءَ بندیگ کنگ بوتگ بلے انگت ءَ آئی ءَ را وتی کھول ءِ مردماں گوں گند ءُ نند کنگ ءِ اجازت نہ داتگ۔
سی ٹی ڈی ءَ اے گپ جتگ کہ حکیم بلوچ ءِ سیادی گوں بی ایل اے ءَ اِنت کہ آئی ءِ چیر دستی ءَ آئی ءِ دزگیر کنگ بوتگ، بلے تاں انوگ ءَ آ ھچ آمیدگس ءَ پیش نہ بوتگ۔
حکیم بلوچ زورانسری بیگواھی ءِ ھلاپ ءَ بلوچستان بار کونسل ءُ وکیلاں تُرندی ءَ زھرشانی کتگ اَت۔ بار کونسل ءَ آئی ءِ آیگ ءِ ھال راست کتگ۔
ھمے وڑ چہ واشک ءَ سِی ءُ یل جولائی دوھزار ءُ بیست ءُ پنچ ءَ لشکر ءَ ٹکری میر ھاجی ھاسل خان ساسولی ءِ سر ءَ بیڑ برتگ ءُ آئی ءِ ورنائیں بچ عبدالکریم دزگیر کتگ ءُ ناشناسیں جاھے ءَ برتگ کہ چریشی ءَ پد آ بیگواہ انت-