بلوچستان ءِ دمگ کلات ءَ شال ءُ کراچی ءِ شھدگ ءِ سر ءَ سلاہ بندیں مردماں مسافر کوچ ءِ سر ءَ تیرگواری کتگ چریشی ءِ سبب ءَ بازیں مردمانی بیران ءُ بازیں ٹپیگ بوگ ءِ ھال انت-
دمگی مردمانی رد ءَ کوچ چہ کراچی ءَ شال ءَ روگ ءَ بوتگ ءُ ایشی ءِ تہ ءَ کم چہ کم 48 فوجی کارندہ سوار بوتگ اَنت۔ وھدے کہ کوچ کلات ءِ نزیک ءَ نمرغ کراس ءَ سر بوتگ گڑا ناشناسیں سلاہ بندیں مردماں سنگر گپتگ ءُ آئی ءِ سر ءَ اُرش کتگ-
دمگدار ءِ رد ءَ اے اُرش ءَ تاں انوگ ءَ سئے لاش نادراھجاہ ءَ آرگ بوتگ بلے بیران بوتگیں مردمانی کچ گیشتر بوت کنت۔ ٹپیگ زوت نزیکیں سول ھسپتال کلات ءَ سر کنگ بوتگ انت۔
بلوچستان سرکار ءِ جارکش شاھد رند ءَ اے گپ ءِ پدرائی کتگ ءُ گْوشتگ کہ اے تیرگواری ءَ سئے مردم بیران ءُ ھپت ٹپیگ بیتگ اَنت ۔ آئی ءَ گوشت کہ پورسز، دمگدار ءُ ریسکیو ٹیم زوت جاہ ءَ سر بوتگ انت۔
کلات ءِ سول ہسپتال ھم لشکر سر بوتگ ءُ شھری مردماناں پترگ ءِ بندش جنگ بوتگ۔
انگت ءَ کس ءَ اے اُرش ءِ زمہ واری نہ زرتگ ءُ سرکاری تک ءَ انگت ءَ سرجمیں ھال ءُ اھوال ءِ ودار کنگ بوھگ ءَ اِنت۔
بلوچستان ءَ گوستگیں ماھاں پاکستانی لشکر ءِ سر ءَ اُرش گیش بوتگ اَنت ھاسیں رنگ ءَ گْوستگیں ماھاں کہ آ سپر ءِ وھد ءَ جتا جتائیں رنگ ءِ اُرشانی تہ ءَ نشانگ جوڑ کنگ بوتگ اَنت۔
2025 ءَ پاکستانی لشکر ءِ رھادگ بوھگ ءِ وھد ءَ نوشکی ءُ تربت ءَ بلوچ لبریشن آرمی ءِ مجید بریگیڈ ءَ دو فدائی اُرشاں لشکر ءِ سواریں بس نشانگ جوڑ کتگ اَنت۔ ایشی ءَ ابید پاکستانی لشکر ءِ سر ءَ جتا جتائیں وڑیں اُرش ھم کنگ بوتگ اَنت۔