بلوچستان ءِ دمگ آواران ءِ ھند جھاؤ ءَ مرچی سھب ءَ پاکستانی لشکر ءِ کاروان ءِ سر ءَ سنگر گپتگیں مردماں اُرش کتگ۔
دمگی مردمانی رد ءَ جنگ ءِ وھد ءَ یک کلاکے ءَ گیش ٹوھیں کچے ءَ تیرگواری ءُ تراکانی توار اِشکنگ بیتگ انت۔ اے اُرش ءِ آسر ءَ پاکستانی لشکر ءِ بازیں کارمند بیران ءُ ٹپیگ بوتگ انت۔
فوج ءِ بنشوندار ءِ رد ءَ اے اُرش ءَ بیران بوتگیں مردمانی تہ ءَ یک گچینی آپیسرے میجر رب نواز ھوار اِنت کہ آئی ءِ ھند ءُ دمگ کشمیر اِنت۔ آ وتی یونٹ ءِ گون ءَ آپریشن ءَ بوتگ کہ آئی ءِ کاروان جھاؤ ءِ گوچرو کور ءِ دمگ ءَ نشانگ جوڑ کنگ بوتگ۔
بلوچستان ءَ گوستگیں ماھانی تہ ءَ پاکستانی لشکر ءِ سر ءَ اُرش گیش بوتگ اَنت۔ بلے انگت ءَ کس ءَ اے اُرش ءِ زمہ واری نہ زرتگ۔
بلوچ آجوئی دوستیں سلاہ بندیں گل بلوچستان لبریشن فرنٹ اے دمگ ءَ پرکار اِنت ءُ گوستگیں وھداں ھم ات وڑیں اُرشانی تہ ءَ پاکستانی لشکر ءَ نشانگ جوڑ کنگ ءَ اِنت۔