بلوچستان ءِ دو جتاجتائیں دمگ پنجگور ءُ آواران ءَ سلاہ بندانی تیرگواری ءَ چہ ڈیتھ اسکواڈ ءَ سیادی داروکیں دو کارندہ بیران یکے ٹپی بیتگ-
گیشیں ھالانی رِد ءَ پنجگور ءِ دمگ گرمکان ءَ گوستگیں شپ ءِ کساس یازدہ ناشناسیں سلاہ بندیں مردمانی تیرگواری ءَ چہ ڈیتھ اسکواڈ ءِ کارندہ رحمت اللہ ء حمید جاہ پہ جاھی بیران بیتگ وھدے کہ آئی ءِ کستریں برات سعداللہ سک ٹپی بیتگ-
دمگی مردمانی گوشگ اِنت اُرشکاراں وئیلجاہ ءَ سر ءَ سلاہ ھم وتی ھمراھی ءَ برتگ اَنت گوں-
ھمے وڑ آواران ءِ دمگ جھاؤ ءَ سلاہ بندیں مردمانی تیرگواری ءَ چہ ڈیتھ اسکواڈ ءِ سروک بیران بیتگ-
اِھوالکار رِد ءَ مروچی سُھب ءَ کساس یازدہ جھاؤ ءِ دمگ واجہ باگ بازار ءَ ناشناسیں سلاہ بندیں مردماں نیک جان محمد حسنی ء نورو نشانگ کتگ، چریشی ءِ آسر ءَ آ جاہ پہ جاھی بیران بیتگ- اشی ءَ پد آئی ءِ لاش پہ گیشیں چار ءُ ٹپاس کنگ ھاتر ءَ نادُراھجاہ ءَ برتگ-
ھمے گوشگ بوگ ءَ اِنت کہ نیک جان محمد حسنی پاکستانی پوج ءِ چیردستی ءَ پُرکاریں سلاہ بندیں ٹولی ڈیتھ اسکواڈ ءِ یک ھاسیں سروکے بیتگ کہ آ بازیں بلوچ سرمچار ءُ بے میاریں شھریانی شھیدی ءُ زورانسری آوار جنی ءَ ھوار بیتگ-
زانگ بہ بیت بلوچستان ءَ ڈیتھ اسکواڈ پاکستانی پوج ءُ آئی ءِ چیریں ادارھانی چیردستی ءَ کارکنگ ءَ اَنت آیانی سر ءَ بھتام ھست کہ آ بے میاریں بلوچ پُسگانی شھید کنگ ءُ زورانسری آوار جنی ءَ آیانی دست تچکی ءَ ھوار اِنت ءُ بلوچ آجوئی لوٹوکیں سلاہ بندانی ھلاپ ءَ ھم کارمرز بیگ ءَ اَنت-
تنی وھدے اے دوئیں اُرشانی زمہ واری انگت ھچ گل ءَ نہ زرتگ اَنت-