مستونگ پریس کلب ءَ ھمے ماہ ءَ شال ءِ نزیک ءَ ایپ سی ءِ تیرگواری ءَ نمیران بوتگیں اھسان شاہ ءِ مات ءَ گوں اھوالکاراں تران کنان ءَ گوشتگ کہ من شھید اھسان شاہ ءِ بد نسیب ایں مات آں کہ آ ھما وھد ءَ نمیران کنگ بوتگ وھدیکہ درسیں مردم مزنیں ائید ءِ چن ءُ لانچ ءَ شاتکامی ءَ دلگوش بوتگ انت ۔ منی چک ائید ءِ چیزانی زیرگ ءَ شال ءَ شتگ بوتگ کہ آئی ءِ سنگت شئیب ھم آئی ءِ ھمراہ بوتگ ۔
آئی ءَ سرجمیں ھال داتگ ءُ گوشتگ کہ سَے جون ءَ شال گنجی ڈور ءَ ایپ سی ءَ آ داشتگ انت ءُ پدا آیانی سرا تیرگواری کتگ ۔ منی زھگ ءِ گردن ءَ دو تیر لگ اتگ ءُ آئی ءِ سنگتے چم ءَ تیر ءِ لگ اِتگ ۔
اھسان شاہ ءِ مات ءِ گوشگ ات کہ وھدیکہ منی چک کپتگ گڈا ایپ سی والا گاڑی ءَ ایر اتکگ انت ءُ لگ جتگ ءُ راست کتگ ءُ دگہ ایپ سی والایائی ءَ آئی ءِ سینگ ءَ توپک ءِ گلو داشتگ ءُ پٹ اتگ ءُ وتی اسر ءَ گوشتگے کہ اشی ءَ ھچ گون نیست ۔
آئی ءَ گوشتگ کہ پدا رند ءَ ایپ سی والایاں ایمرجنسی لوٹارینتگ زدگ بوتگیں شئیب شال دیم داتگ ءُ آ بیھار ھم داتگ کہ اگاں آئی ءَ درشان دات گڈا آئی ءِ الاج کنگ نہ بیت ۔
آئی ءَ گوشتگ کہ اول سر ءَ مارا ھمے گوشگ بیتگ کہ مئے چک ناشناساں جتگ وھدیکہ منی لوگواجہ مستونگ ءَ شتگ ارزی دیگ ءَ گڈاآ بیھار دیگ بوتگ کہ اگاں ایپ آئی آر کت گڈا ترا گشتر تاوان دیگ بیت ءُ چہ کار ءَ ھم کشگ بہ بئے بلے منی لوگواجہ ءَ زور داتگ کہ الم ارزی لکگ بہ بیت گڈا آ ھمے گوشگ بیتگ کہ چی ڈی سی ءَ موکل بہ گپت پدا ڈی سی گور ءَ شتگ ڈی سی ءِ رویشت ھم ھمے وڈ بوتگ کہ اگاں تو سر پُر کت ترا چہ کار ءَ کشگ بیت ۔
آئی ءَ گوشتگ وھدیکہ پولیس ءُ ڈی سی ءَ انکار کتگ گڈا اھسان ءِ پت ءَ ریس کانپرنس کتگ ءُ من ھم وتی درشان نبشتہ کنائینتگ بلے پدا ھم ھچ کس مئے گور نہ اتکگ ءُ ناکہ گامگیج زورگ بوتگ ھمے واست ءَ ما لاچار بوتگیں دوبر پریس کانپرنس کنگ ءَ ایں کہ منی چک انساپ دیگ بہ بیت ۔
آئی ءَ گوشتگ من وت ھم باز براں تانہ ءَ شتگاں ءُ امیدگس ءَ ھم شتگاں بلے ھچ پہ ھچ ۔ آئی ءَ گوشتگ اگاں منی چک ءَ چیزے کتگ مارا سبوت دیگ بہ بیت درساں بگوش یے کہ ایپ سی ءَ جتگ ۔
آئی ءَ گوشتگ کہ منی زھگ ءِ کسور ھمے بیتگ کہ آ نودربرے بیتگ ۔ دگ ءِ سرا اوشتاتگیں پہ نام مئے پھازوکاں منی زھگ ءِ گور ءَ چی دیستگ ؟ مناں گوشگ بہ بیت ۔ من زاناں سرکار ءِ تہ ءَ نشتگیں مردم ھم ھمے ادارھانی چانیگ واراں کہ بلوچ چکچینی ءَ کنگ ءَ انت ۔
آئی ءَ گوشتگ کہ مستونگ ءَ بازیں ماتے ھست کہ آیانی زھگ ایپ سی ءَ جتگ انت من چہ آیاں لوٹ کناں کہ ترس ءِ ساھگ ءَ یل بہ دی انت ءُ پہ انساپ ءِ ھاتر ءَ بوشتاں ۔ اگاں منی کھول ءَ ھرچی بہ بیت آئی ءِ زمہ دار ریاست انت ءُ مئے ترسنوکیں ڈی سی ءَ ھرچی کنگی ایں بہ کنت بلے نوں ما پشت ءَ نہ کنز ایں ۔
آئی ءِ مات ءَ گشتگ کہ مناں چہ اے ریاست ءَ ھچ امیت نیست منی امیت وتی بلوچ برات ، گھار ءُ ھمنکس کہ بلوچ گل ھست انت گوں ھمایاں بندوک ایں ۔ من چہ وتی درسیں بلوچ سیاسی ادارھاں چہ لوٹ کناں کہ مناں انساپ دیگ بہ بیت ءُ منی زھگ ءِ کشندہ انساپ ءِ تھتگ ءَ آرگ بہ بنت ۔