وائس فار بلوچ مسنگ پرسنز ءِ چئیرمین نصراللہ بلوچ ءَ وتی درشان ءِ تہ ءَ گْوشتگ کہ بلوچ نودربر ماہ جبین ءِ زورانسری آوار جنی ءَ دو ھپتگ سرجم بیگ ءَ اِنت تنی وھدے آ دیم ءَ آرگ نہ بیتگ نانکہ آمیدگس ءَ پیش کنگ بیتگ ءُ نانکہ کھول ءَ را آئی ءِ دزگیری ءِ درگت ءَ سرپدی دیگ بیگ ءَ اِنت، کہ اے تُرسناک اِنت ءُ ڈیھی کانود ءَ دیگ بیتگیں شھریانی بُنکی ھکانی سنگین ھلاپ ورزی اِنت کہ آئی ءِ تُرندیں لبزاں گوں ایر جن ایں-
آئی ءَ گْوشتگ کہ ھکومت ءَ چہ یکرندے پد ءَ لوٹ کن ایں کہ اگاں بلوچ نودربرانی سر ءَ کجام وڑیں بھتامے ھست گُڑا آیاں آمیدگس ءَ پیش بہ کن اِت سپائی ءِ موہ بدے اِنت، اگاں آ کجام وڑیں درکانودی کارے ءَ ھمگرنچ بیت گُڑا ڈیھی کانود ءِ رِد ءَ سزا دیگ بہ بیت مارا ھچ اتراز نہ بیت بلے آ ءُ آئی ءِ برات یونس بلوچ ءِ زورانسری بیگواہ کنگ ڈیھی کانود ءُ انسانی ھکانی ھلاپ ورزی اِنت کہ آئی ءِ ھلاپ ءَ وائس فار بلوچ مسنگ پرسنز ڈیھی کانودی رِد ءَ جوانیں وڑے ءَ زھرشانی ءِ ھک دار اِیت-
نصراللہ بلوچ ءَ گْوشتگ کہ دانکہ بلوچ نودربر ماہ جبین ءُ آئی ءِ برات دیم ءَ آرگ نی بیتگ، یا کہ آ یل کنگ نہ بنت، ھمکروچ وائس فار بلوچ مسنگ پرسنز آیانی یل کنائینگ ھاتر ءَ توار چست کنت-
آئی ءَ سرجمیں پڑ مردماں گوں دزبندی کتگ کہ آ ھمکروچ سوشل میڈیا سر ءَ یک یک پوسٹے بہ کنت ءُ آیانی زورانسری آوار جنی ءِ ھلاپ ءَ توار چست بہ کنت-