ماما قدیر بلوچ نادراہ، وی بی ایم پی ءَ گدان ءِ برجاہ دارگ ءِ جار جتگ

وائس فار بلوچ مسنگ پرسنز ءِ رد ءَ گل ءِ سرکماش نصراللہ بلوچ ءِ سروکی ءَ دیوان ءِ برجم دارگ بوتگ، کہ اودا ماما قدیر جاندراھی ءَ تاں گدان ءِ برجاہ دارگ ءِ پیسلہ کنگ بوتگ –

گیشیں ھالانی رِد ءَ وائس فار بلوچ مسنگ پرسنز ءِ مروچی دیوان ءِ برجم دارگ بوتگ، دیوان ءَ زورانسری آوار جنگ بوتگیں مردمانی جیڑہ، تنزیمی امور ءُ گدان ءِ جاور ھالانی باوست کنگ بوتگ –

دیوان ءَ پیسلہ کنگ بوتگ ماما قدیر ءِ جاندراھی ءَ تاں گدان بند کنگ نہ بیت بلکیں آ برجاہ دارگ بیت تاکہ زورانسری آوار جنگ بوتگیں مردمانی کھول ءُ ایندگہ ایردستیِ مردمانی ھکانی ھاتر ءَ توار چست کنگ بہ بیت –

دیوان ءَ اے پیسلہ ھم کنگ بوتگ زھرشانی گدان زمہ داری ایگزیگٹو کمیٹی ءِ باسک نیاز محمد نیچاری ءَ دیگ بوتگ کہ باندا گدان ءِ سروکی ءَ کنت – نیاز محمد نیچاری ءِ چیردستی ءَ زھرشانی گدان ءَ مراگش ءُ زھرشانی کنگ بنت تاکہ مردمانی دلگوش اے مزنیں جیڑوے نیمگ ءَ آرگ بہ بیت –

زانگ بہ بیت بلوچ انسانی ھکانی رھشون ءُ وائس فار مسنگ پرسنز ءِ سرکماش ماما قدیر بلوچ سک باز نادراہ ایں کہ آ کراچی ءَ ڈاکٹر ضیاء الدین نادراھجاہ ءَ آئی سی یو ءَ برگ بوتگ – آئی ءِ ھنوگیں جاور چوش انت کہ ڈاکٹراں آ آکسیجن ءِ سرا کتگ –

16 مئی 2025 ءَ ماما قدیر بلوچ نادراہ بوگ ءِ سوب ءَ نادراھجاہ ءَ برگ بوتگ – ھما وھد ءَ وائس فار بلوچ مسنگ پرسنز ءَ وتی آفیشل پیج ءَ یک تامرے شنگ کتگ بوتگ کہ ماما قدیر بلوچ نادراھجاہ ءَ تھت ءِ سرا وپتگ ءُ آگسیجن دپ ءَ انت – ھما ٹائم ءَ چہ آئی جاور ھراب انت آ ھنو آئی سی یو ءَ کنگ بوتگ -.

ماما قدیر بلوچ ءَ گوستگیں دھکے ءَ گیش انت بیگواھیں مردمانی یل کنائینگے ھاتر ءَ زھرشانی کنگ ءَ انت – آئی ءِ سروکی ءَ شال پریس کلب ءِ دیم ءَ زھرشانی گدان برجاہ انت، کہ آ شُد لاپی سھب ءِ ادار دھ ءَ بگر تاں بیگاھے شش ءَ نشتگ ءُ گھگیری کنگ ءَ انت آئی ءِ جانی نزوری ءُ اُمرے مزن بوگ ءَ آ سانمند بوتگ – آئی ءِ نادراھی ءِ سوب ءَ انسانی ھکانی باسک، بلوچ راج دوست ءُ دوزواہ پدرد انت – درسیں مردماں گوں لوٹ کن ایں کہ ماما قدیر بلوچ ءِ جاندراھی ءَ نیک دوائی بہ کن انت –