بلوچ چُکچینی ءُ زورانسری آوار جنیاں: بی وائی سی ءِ جار پد ءَ باندا سرجمیں بلوچستان ءَ زھرشانی زرمبشت برجم دارگ جار

بلوچ یکجھتی کمیٹی ءِ نیمگ ءَ چہ یک جارے شنگ کنگ بیتگ کہ آئی ءِ تہ ءَ گوشگ بیتگ بلوچ چُکچینی ھچ چو ھادساتی کارے نہ اِنت بلکیں پاکستان ءِ یکجاھی پالیسیانی آسر اَنت-

جار تہ ءَ گوشگ بیتگ کہ زورانسری آوار جنی ءُ دروگیں میڑاں کوش اے پالیسی ءِ بھر اَنت کہ چہ اشی ءَ بلوچ راج ءَ تُرسینگ، ازیت، پے پھازی نشانگ کنگ ءَ اِنت-

جار ءِ تہ ءَ دیمتر ءَ گوشگ بیتگ کہ گوستگیں دو ماہ ءِ میان ءَ زورانسری آوار جنگ بیتگیں مردماں دروگیں میڑاں کُشگ ءِ وئیل ءِ تہ ءَ بے ھساب ءَ گیشی اتکگ چریشی ءَ سرجمیں بلوچ چاگرد ءِ گم ءُ رنجانی تہ ءَ دوچار اَنت انسانی ھکانی ھلاپ ورزیانی سر ءَ راج ءِ زھری گیش بوان اِنت بلے ریاستی ادارہ اے زوراکی ءَ گیش کنگ ءَ اِنت-

بلوچ یکجھتی کمیٹی ءِ پارٹی سروکانی ھلاپ ءَ زوراکی ءُ دزگیری ھم ھمے ریاستی پالیسیانی دْرچ گْوشتگ کہ اے گامگیج زرمبشت ءِ ایرموش کنگ ھاتر کنگ بیگ ءَ اِنت، بلے راجی جُھد دارگ نہ بیت-

جارکش ءَ گْوشتگ بی وائی سی ءِ سروکاں بندیگجاہ ءَ چہ بندیگ کنگ ءَ زرمبشت ءِ توار ایرموش کنگ مہ بیت پرچاکہ اے زرمشبت ھرچ زانتکاریں بلوچ ءِ توار اِنت کہ چُکچینی ءِ ھلاپ ءَ پرکار اِنت-

بی وائی سی ءِ جار تہ ءَ گوشگ بیتگ کہ پانزدہ مئی ءَ سرجمیں بلوچستان ءَ زھرشانی روانک بندات کنگ بنت دانکہ ریاستی زوراکی ءِ ھلاپ ءُ راجی گھگیری مھکم کنگ بہ بیت-

جار تہ ءَ بلوچ راج ءَ چہ دزبندی کنگ بیتگ آ وتی دمگاں بیوکیں زھرشانیاں جوانیں وڑے ءَ بھر بزور اَنت زورانسری آوار جنی ءُ دروگیں میڑانی ھلاپ ءَ توار چست بہ کن اَنت ءُ راجی یکجاھی ءِ درشان کنان ءَ اے زرمبشت ءِ بھر جوڑ بہ بنت-

جار ءِ گُڈی ءَ گوشگ بیتگ کہ بی وائی سی اے اِھد کتگ کہ دانکہ بلوچ چُکچینی پالیسی ھلاس نہ بنت اے جُھد برجاہ بنت-