تربت نیو بھمن ءَ زورانسری بیگواہ کنگ بیتگیں 16 سالی ئیں نودربر نعیم بشیر ءِ یل نہ کنگ ءِ سر ءَ آئی ءِ مات ءُ گھار ءَ تربت پریس کلب ءَ پریس کانپرنس کتگ گیشیں پریشانی ءِ بیان کتگ۔
لوگ ءِ مردماں کیچ ءِ دمگی انتزامیہ، چہ ھکومت ءِ بلوچستان ءَ لوٹ کتگ کہ نعیم زوت یل کنگ بہ بیت۔
آیاں گوشتگ کہ نعیم بشیر کہ 12 جمائت ءِ نودربرے 5 فروری 2025 ءَ چہ وتی لوگ ءَ زورانسری بیگواہ کنگ بوتگ۔ آ یک ایمنیں، تالیم دوست نوجوانے ءُ اے وھد ءَ آئی ءِ سالگشتی چکاس بیگ ءَ اَنت چوشکہ ساڑی نہ بیگ ءِ وجہ ءَ آئی ءِ تالیمی آیوکیں وھد تاوان ءِ نیمگ ءَ روگ ءَ اِنت۔
نعیم وتی پت ءُ مات ءِ یکیں بچ اِنت ءُ آئی ءِ نہ بیگ ءَ چے دراھیں ھاندان گیش زھنی تکلیپی ءَ دور داتگ اَنت۔ لوگ ءِ مردمانی متابک ءَ دمگی انتزامیہ ءِ نیمگءَ چے اول ءَ دو داں سے روچ ءَ یل کنگ ءِ یکین داتگ بیتگ وھد ءَ چہ سے ماہ گیش گوستگ ءُ نعیم ءِ ھچ ھال نیست۔
لوگ ءِ مردماں گوشتگ کہ آیاں ماہ ءِ رمضان ءِ وھد ءَ ھم زھرشانی کتگ ءُ ائید ءِ روچ ءَ آیانی واستا درستاں چے گیش تکلیپی پدّر بیتگ۔ نعیم ءِ مات ءَ گوشتگ کہ پہ ما ائید، ائیدے نہ بیتگ۔
آیاں پریشانی ءِ بیان کتگ ءُ گوشتگ کہ آیاں امن ءُ کانون ءِ تیرانی میان ءَ وتی لوٹ چست کتگ بلے اگاں سُھل ءِ کانون مہ بیت گڑا گیشتریں زھرشانی کنگ ءَ مجبور بئیں۔
نعیم بشیر ءِ پت کہ وت یک شورا یے ریاستی ادارھانی سر ءَ بروسہ کنگ ءِ بیان کتگ لوٹ کتگ کہ ما مردم سُھل ءِ لوٹوکیں مارا روڈانی سر ءِ آیگ ءَ مجبور مہ کن اِت ما بس انساپ ءِ لوٹ اِیں۔تاوان دیستگیں ھاندان ءَ ھکومت ءِ بلوچستان، دمگی انتزامیہ کیچ، دمگی ایم پی ءُ دگہ دمگانی ادارھاں چے لوٹ کتگ کہ آ زوت نعیم بشیر ءِ یل کنگ ءِ املی ءُ سانمندیں گامگیج ءَ بہ کن اَنت۔
آیاں لوٹ کتگ ءُ گوشتگ کہ آیاں انساپ لوٹ اِیت ءُ آیانی چُک نعیم بشیر ءِ سلامتی واتری بہ بیت۔