ھوراں کہ گْوارگی نہ اِنت نام گوریچ ئیگ اِنت
نبشتہ کار: اُزیر بلوچ
دی بلوچستان پوسٹ
دشت ءِ کسانیں میتگے ءَ بیگاہ ءِ سھت اَت پیر ءُ کماش، جنین ءُ ورنایانی دیوان اَت ، چاہ ءُ چلیم ءُ کسہ جَنگ کائی اَت۔ شھر ءَ چہ اتکگیں ورنا شاھان نوک نوکیں گپ ءُ کسہ آرگ ءَ اَت، کماش ءُ پیریں آئی ءَ گوش دارگ ءَ اِت اَنت۔ شاھان ءَ ھمے زیتاں سی ایس ایس ءِ چکاس پاس کُتگ اَت ءُ گل ءَ بال اَت، بگلُک ءَ بگلُک اَت ءُ کس ءَ بھ کنگ ءَ نہ اَت۔ شھری زِند ءِ سر ءَ گپ ءَ اَت، چُکاں بہ وانین اِت ءُ گمراہ بیگ ءَ میل اِت ھمے ڈولیں گپاں گوں دیوان وتی نیمگ ءَ دلگوش گْور کُتگ اَت۔
پیریں کماشے ءَ گپ گپ ءِ تہ ءَ درائینت “ شما واجھیں مردم اِت، سرکار ءِ نوکر اِت ءُ شمارا مئے وڑیں بزگانی واستا ھچ مھر نیست۔” ھمے گپ ءِ اِشکنگ ءَ گوں سی ایس ایس ءِ پاس کُتگیں ورنا سُھر تر اِت ءُ درائینت ئِے” ھو، شمئے چُکاں نوکری نہ رس اِیت نی شمارا زھر کیت۔ ما انگت وتیگ ایں، ما کہ نوکری مہ کن ایں دری مردم کاینت ءُ نوکریاں بر اَنت۔” کش ءَ نشتگیں ناکو ھیاتان ءَ پسو دیان ءَ گوشت کہ“ اناں، منی پِت، مارا کسی سر ءَ زھر نئیت، مئے مردم ایمن بہ بنت ایشی ءَ چہ مستریں وشی نیست۔
بلے شمارا یات اِنت پاری ناکو گنگُزار ءِ بچ گار اَت گڑا مردماں راہ بستگ اَت کہ مئے چُک ءَ یلہ کن اِت، سرکار ءِ دری مردماں وَت اتک نہ کُت گڑا اسپیت پوشیں بلوچ مردے دیم دات اِش ءُ نشتگیں مردماں سوگند ءُ مسام کُت ءُ مردم پاد کُت اَنت کہ شمئے چُک سے روچ ءِ تہ ءَ در کیت۔ پد ءَ شما دیست کہ چار ماہ ءَ پد گنگُزار ءِ بچ چاکر ءِ تیر سُپتگیں جون دست کپت۔” ھمے میان ءَ دیوان ءَ نشتگیں دگہ ورنایے ءَ درائینت “ ناکو ایشاں بِل، ایشاں وشی ءُ زر دیستگ نی کوم ءُ راج ءَ چہ بے ھیال اَنت۔ جھندم ء مردمانی کمک کنگ ءَ اے مئے بزگ کنگ ءُ پُلگ ءُ ورگ ءَ ھوار اَنت۔ پد ءَ نامو کن اَنت کہ مئے گور ءَ دگہ راہ نیست۔”
سی ایس ایس ءِ چکاس ءَ پاس بیتگیں ورنا شاھان گْوات گِپتگ اَت گڑا درائینت ئِے“ ھو، گڑا بیار اِت شما انچیں معاشی نظامے کہ ما کار کُت بہ کن ایں، ھُشک ءَ نندگ ءُ بٹاک جنگ نہ اِنت۔ ما سرکار ءِ مزنیں نوکری مہ گریں دگرے گِر اِیت۔” ورنا ءَ گوں سُبکیں توار ءَ پسو دات “ تئی وانگ ھر ءِ تِر، تو انگت اے گپ ءَ سرپد نہ ئے کہ دانکہ ترا استان مہ بیت معاشی نظام بیت نہ کنت۔ استان ءِ مستریں بھراں چہ یکے معاشیت اِنت۔ ھمیش اِنت راج وتی استان ءِ جھد ءَ اِنت، بلے شمئے وڑیں بیوروکریٹس نشتگ ءُ ھمے استان ءِ ناں تھنا بھر جوڑ اَنت بلکیں آئی ءَ گیشتر مھکم کنگ ءَ اَنت۔” دیوان برجاہ اَت، گپ ءُ رپ اَت، کندگ ءُ مسکرا اَت۔ اے گپانی گوشدارگ ءَ چہ شاھان چہ دیوان ءَ پاد اَتک ءُ روگ ءَ لگ اِت۔
ھمد ءَ نشتگیں شیتانیں گونڈوے ءَ کُکار کُت “ ھاں، بہ دار پاداں، دارگ نہ بہ ئے تو، چمپلاں بر گوں۔”
اے گپ ءَ سالے گوستگ اَت میتگ ءَ ھال اَتک کہ ناکو ھیاتان ءِ بچ میران چہ شھر ءَ وانگ ءِ موکلاں لوگ ءَ پیداگ بیتگ ءُ نیم راہ ءَ چِست کنگ بیتگ۔
میتگ ءَ ورنا ءُ جنیناں ھمت کُت ءُ میتگ ءِ نزیکیں مزن دگ بند کُت ءُ نِشت اَنت۔ راہ ءِ بند بیگ ءِ چار کلاک ءَ رند مزنیں کچے ءَ پُولیس ءُ سپاھی اتک ءُ مُچ بیت اَنت کمو سھت ءَ پد یک اسپیت پوشیں بلوچ مردے پہ مزاکرات ءَ اَتک۔
مرد کہ زھرشانی ءِ سر ءَ سر بیت داں دیست ئِے ناکو ھیاتان ءَ وتی بچ ءِ پوسٹر دست ءَ اِنت ءُ مزن دگ ءِ چار راہ ءِ سر ءَ اوشتاتگ۔ ناکو ھیاتان ءِ چم شاھان ءَ کپت اَنت کہ اسپیتیں پوشاکے چاڑینتگ ئِے ءُ چار گاٹ ئِے پُشت ءَ گون اِنت ءُ مَلّان اِنت دیم پہ مردماں۔
ناکو ھیاتان ءِ دپ ءَ در آتک “ شاھان تو گوں وتی سپاھیگاں مئے لٹ دیگ ءَ پیداگ ئے!” پد ءَ ناکو ھیاتان اُوشتگی جاہ ءَ کپت۔۔۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-