بی ایل ایف ءَ ھاران، نوشکی، زامران ءُ دشت ءَ بند ساچی شرکت ءُ پوج سر ءَ بیتگیں اُرشانی زمہ واری منّ اِتگ اَنت

بلوچستان لبریشن فرنٹ ءِ جارکش میجر گْوھرام بلوچ ءَ شنگ کتگیں درشان ءِ تہ ءَ زامران، ھاران ، دشت ءُ نوشکی ءَ پاکستانی پوج، بند ساچی شرکت ءُ پھازی بند ءِ سر ءَ بیتگیں اُرشانی زمہ واری منّ اِتگ اَنت-

بی ایل ایف ءَ وتی درشان ءِ تہ ءَ گْوشتگ کہ سے مئی ءَ دشت بلنگور ءِ دمگ سورک ءَ بی ایل ایف ءِ سرمچاراں بے زرورتیں پھازی بند ءِ جوڑ کنوکیں ٹریکٹرانی ٹائر تراکینتگ اَنت-

جارکش ءَ گْوشتگ کپ ٹھیکیدار خورشید نگوری ءِ ھال داتگ کہ بی ایل ایف اے بے زرورتیں بند ءِ جوڑ کنگ ءِ موکل ندنت، بلے آ سرپد نہ بیتگ کہ چریشی ءَ پد سرمچاراں کڈنی ھساب ءَ پنچ ٹریکٹرانی ٹائر تراکینتگ ءُ تاوان داتگ اَنت-

جارکش ءَ دیمتر ءَ گْوشتگ کہ نیمروچ ءِ ساھت یازدہ ءَ چہ دوازدہ ءَ تاں بی ایل ایف ءِ سرمچاراں نوشکی ءِ دمگ البت ءِ نزیک ھاران – نوشکی دگ سر ءَ ناکہ بندی کتگ گاڑی پٹ ءُ پول کتگ اَنت وھدے کہ سرمچارانی دگہ یک ٹولی ءَ زرین جنگل ءَ بند ساچی شرکت سر ءَ اُرش کتگ مشینری مانداشتگ اَنت- ءُ چار مردم شکی ئیں پُرکاریانی سبب ءَ دزگیر ھم کتگ اَنت- آیانی پٹ ءُ پول برجاہ ءَ اِنت-

جارکش ءَ گْوشتگ کہ دگانی سر ءَ سرمچاراں اے وڑیں ناکہ بندیاں ءُ پٹ ءُ پول مول ءُ مراد مساپراں تنگ کنگ نہ اِنت بلکیں زورگریں ریاست ءِ بلوچ دُژمنیں پوج ءُ چاریگانی نشانگ کنگ ءُ آیانی سُر ءُ پرانی گر ءُ دار کنگ اِنت-

جارکش ءَ دگہ یک درشانے ءِ تہ ءَ گْوشتگ کہ مئے سرمچاراں چار مئی بیگاہ ءِ شش ءَ کیچ ءِ دمگ زامران ءَ کوتان ءِ ھند سر ءَ برجاھیں پاکستانی پوج ءِ چوکی ءَ چہ ڈن اوشتوکیں یک کارندھے اسنائپر اُرش ءَ نشانگ کتگ ءُ کُشتگ-

جارکش ءَ گْوشتگ کہ دگہ یک اُرشے بی ایل ایف سرمچاراں پنچ مئی بیگاہ نُھ ءِ نزیک ءَ ھاران ءِ شھر ءَ گْواش دگ سر ءَ برجاھیں پوج ءِ چیک پوسٹ گرنیڈ لانچر ءُ وتکاریں سلاھاں چہ اُرش کتگ ءُ نشانگ کتگ- اُرش ءَ دُژمنیں پوج ءَ جانی ءُ مالی تاوان چست کنگ کپتگ-

جارکش ءَ گْوشتگ اُرش ءَ پد پروش وارتگیں پاکستانی پوج ءَ تُرندیں تیرگواری کتگ ءُ مئے سرمچارانی انگیر کنگ جُھد کتگ- شھری چیرجنگی ءَ زانتکار مئے سرمچاراں وتی ھستیں رپکانی رِد ءَ وتی مُھریں اوتاکاں سر بیتگ اَنت-

جارکش ءَ گْوشتگ کہ اے اُرش بلوچستان ءَ زورگریں پوج ءِ ھلاپ ءَ برجاہ مئے سلاہ بندیں جُھد سوبمندی ءُ مئے ادارھاں پدر کنت- ما تچک کنگ لوٹ ایں کہ اے وڑیں سرجمیں جاھاں اود ءَ ریاستی پوج ساڑی اِنت، مئے سرمچارانی نشانگ تہ ءَ اَنت – بلوچ راج ءِ آجوئی ءِ کشک ءَ ھچ وڑیں دیمونی ءَ چہ چک ءُ پد نہ بہ ایں-

جارکش ءَ گْوشتگ بی ایل ایف اے سرجمیں اُرشانی زمہ واریاں منّ اِیت، ءُ سرجمیں بلوچستان ءَ بند ساچی شرکتاں کڈن کنت کہ آ بلوچستان ءَ زورگریں پاکستان ءِ پُلپانچیں شوربندی ءُ مراگشاں بھر مہ زور اَنت-