تربت : پاکستانی پوج دست ءَ دو مردم بیگواہ

بلوچستان ءِ دمگ کیچ ءِ بُنجاھی شھر چہ تربت ءَ پاکستانی پوج ءَ دو مردم آوار جتگ ءُ بیگواہ کتگ اَنت-

دوئیں زورانسری آوار جنی ءِ وئیل نادُراھجاہ نزیک ءَ دیم ءَ اَتکگ اَنت-

اِھوالکار رِد ءَ بیست نُھ اپریل ءَ خُدا بخش ء مندی بلوچ جھمنند ھوشاپ بلوچ نادُراھجاہ نزیک ءَ پاکستانی پوج ءَ آوار جتگ ءُ ناشناسیں جاھے ءَ برتگ- ھمے روچ ءَ حکیم بلوچ ء جمعہ جھمنند آسکانی بازار تربت ھم پوج ءَ دزگیر کتگ ءُ بیگواہ کتگ-

اسرمندیں کھولانی گوشگ اِنت کہ دوئیں مردم ھچ وڑیں درکانودی پُرکاریاں سیادی نہ بیتگ، ءُ آ مدامی وڑ ءَ وتی کار ءَ دلگوش بیتگ اَنت-

زورانسری آوار جنی ءِ ھلاپ ءَ پُرکار انسانی ھکانی گل پانک ءَ اے وئیلانی تُرندی ءَ گوں ایر جنان ءَ گْوشتگ کہ بلوچستان ءَ برجاھیں انسانی ھکانی ھلاپ ورزی ھچ وڑ منّگ نہ بیت-گل ءَ لوٹ کتگ کہ خُدا بخش، حکیم بلوچ ءُ دگہ بیگواھیں مردماں زوت یل بہ کن اِت-

پانک ءَ میان استمانی مردماں چہ دزبندی کتگ کہ بلوچستان ءَ برجاھیں انسانی ھکانی لگتمالی ءِ ھلاپ ءَ گوں سنجیدگی ءَ گامگیج بزور اِیت ءُ پاکستان سر ءَ زور بدنت کہ آ زورانسری آوار جنی ءَ ھلاس بکنت-