کلات: پک اپ گاڑی ءِ سر ءَ بمب تراک، سَے مردم بیران، پنچ زدگ بیتگ انت

کلات امیری ءَ روکیں پک اپ گاڑی ءِ سر ءَ بیتگیں بمب تراک ءِ آسر ءَ دو زالبولاں ھوار سَے مردم بیران ءُ پنچ زدگ بیتگ انت-

بیران بیتگیں مردمانی پجار عبداللہ ء عبدالحمید نیچاری، بی بی ھسینہ ء علی مھمد نیچاری، گل بانو ء ھیر مھمد نیچاری جھمنند امیری کلات ءِ ناماں زانگ بیتگ انت-

زدگ بیتگیں مردمانی پجار علی جان ء امیر علی جھمنند دشت کلان کلات، مھمد ھیات ء علی مھمد نیچاری جھمنند امیری کلات، میر گل ء مھمد گل نیچاری جھمنند امیری کلات، عزت خان ء عظیم جتک جھمنند ناصر آباد گرانی کلات ءُ مھمد اسلم ء گوس بکش جتک جھمنند گرانی کلات ءِ ناماں زانگ بیتگ انت-

اھوالانی رد ءَ بمب دگ ءِ کش ءَ ایر بیتگ ءُ گاڑی گوزگ ءَ بیتگ ھمے وھد ءَ تراک بیتگ-

زدگ بیتگیں مردم کلات ٹیچنگ ھسپتال ءَ سر کنگ بیتگ انت ءُ اود ءَ ایمرجنسی جنگ بیتگ-

واکداراں تنی وھدی تراک ءِ گیشیں سبب نہ گوشتگ انت ءُ لیویز پورس گیشیں پٹ ءُ پول کنگ ءَ انت-